OweWits ucathanyelwa ngamaqembu amakhulu
KULINDWE iBidvest Wits ithathe isinqumo ngesitobha seqembu neBafana Bafana, uSifiso Hlanti, okuvela ukuthi ugaqelwe ngamanye amaqembu amakhulu aseGauteng.
Ngokuthola kweSolezwe ngomthombo osondelene kakhulu neWits, imenenja kaHlanti isizihambise zonke izimfuno zayo kuJose Ferreira, oyisikhulu esiphezulu kwiWits. Empeleni kuthiwa konke okufunwa yilo mdlali kwahlala etafuleni likaFerreira ezinyangeni ezimbili ezedlule ngesikhathi uFerreira esaye phesheya kwezilwandle.
Nakuba esebuyile kulolu hambo, akukho okusakhulunywe iWits ngekusasa lalo mdlali ononyawo oluhle lwesokunxele. Isolezwe liphinde lathola ukuthi empeleni uHlanti usalelwe unyaka owodwa naleli qembu elicijwa uGavin Hunt, okusho ukuthi izophela ngo-2019.
“Inkontileka yakhe isalelwe unyaka owodwa neWits. Lokhu kusho ukuthi izingxoxo sezingaqala neqembu ukuba ngabe lizimisele yini ukwelula inkontileka yakhe.
“Imenenja yakhe yakuthumela konke kwiWits kodwa kusalindwe isikhulu uFerreira ukuba aqalise izingxoxo. Ngiyacabanga ukuthi iWits kukhona esikutholile ngokuthi lo mdlali ufunwa amaqembu athile lapha eGauteng, nokwenza ukuthi uFerreira abukisise kahle isimo ngoba uyazi ukuthi usethubeni lokwenza itshe lemali ngoHlanti,” kusho lo mthombo.
UHlanti ufike kwiZitshudeni ngo-2016 ephuma kuMaZulu FC. Ufike washaya into ecokeme njengoba egcine ngokubizwa eqenjini lesizwe iBafana Bafana elidlale imidlalo yokuhlungela iNdebe yoMhlaba ne-Africa Cup Of Nations.
Imenenja kaHlanti, uSizwe Ntshangase, ayifunanga ukwanda ngomlomo ngesikhathi ibuzwa ngodaba lwalo mdlali.
“Akukho engingakusho ngaye ngaphandle kokuthi usengumdlali weWits, futhi konke kuncike kuyona ngekusasa lakhe,” kusho uNtshangase kafushane.
IWits isanda kulahlekelwa uBen Motshwari noVincent Pule abajayine i-Orlando Pirates.