ISIZOZINZA EKAPA IDIKWENA

IZOFUDUKELA eKapa iPlatinum Stars ehluleke yancama ukuvika izembe kwiAbsa Premiership ngesizini ka-2017/2018.

IDikwena, ehlale emsileni we-log isikhathi eside, ithole ithuba lesibili lokuzisindisa emuva kokuthi i-Ajax Cape Town iphucwe amaphuzu kulandela ukulahlwa yicala ngokudlalisa uTendai Ndoro kungafanele. Ihlale endaweni ka-15 yadlala imidlalo yokuhlunga kodwa yehluleka ukuyiwina.

Abaphathi abasha okukhona kubona umqeqeshi, uRoger De Sa, sebethathe isinqumo sokuthi leli qembu liyifulathele iNorth West, liyozinza eKapa. Isinqumo sithathwe emhlanganweni obukade uyizolo. “Kugcine kuphumelele eyokuthi kuyiwe eKapa. Ezinye izifundazwe ebesikade sikhuluma nazo zithathe isikhathi ukusiphendula ekubeni iPremier Soccer League ibikade isihlezi entanyeni. Kugcine kuvunyelwana ngokuthi sithathe i-Western Cape. NgoLwesine (kusasa) kuzoba nomunye umhlangano lapho kuzocaca khona ikusasa labadlali,” kusho umthombo.

Okhulumela iStars, uTebogo Mochadibane, uthe bazokhipha isitatimende mayelana nekhaya labo elisha leDikwena. Ukufudukela kweStars eKapa kuzokwenza amaqembu akule ndawo adlala kwiNFD abuyele kwamathathu. Kade sekusele Ubuthu Cape Town neStellenbosch emuva kokuthi uTim Sukazi ethenge iCape Town All Stars wayishovela eMpumalanga.