Wesekwa yizifunda esikhundleni asigaqele

Isolezwe - - IZINDABA - MLUNGISI GUMEDE

UYAQINA umkhankaso kaNobhala we-ANCYL KwaZulu-Natal, uMnuz Thanduxolo Sabelo ogaqele isikhundla sokuba ngumengemali walolu phiko, ngemuva kokuthi izifunda zesifundazwe seziphumele obala zathi ziyameseka.

I-KZN iyisifundazwe esikhulu kunazo zonke ze-ANC ilandelwe yiMpumalanga.

Uma wesekwa yiKZN yonke engqungqutheleni kazwelonke usuke usudinga amavoti angemaningi kwezinye izifundazwe ukuze udle umhlanganiso.

Izifunda zaseKZN eziholwa uSihlalo we-ANCYL esifundazweni, uMnuz Kwazi Mshengu, ziveze ukuthi zizophuma ziyokhankasela uSabelo nakwezinye izifundazwe.

Ingqungquthela ye-ANCYL kuzwelonke izoqala ngoSepthemba 6 iphele ngomhla ka-11.

Izoba seNasrec eGoli lapho kwakunengqungquthela ye-ANC kazwelonke.

Ethintwa izolo uSabelo uvumile ukuthi izifunda zesifundazwe zifikile kuyena zizomtshela ukuthi zihlela ukuphakamisa yena kwesikamengameli engqungqutheleni kazwelonke.

“Ngithe uma kuyibona abathi sebefuna ukungithuma komunye umsebenzi ngeke ngize nginqabe ngizokwenza njengoba besho,” kusho uSabelo.

Uthe izifunda zesifundazwe zimtshele ukuthi zizophuma ziyomkhankasela nakwezinye izifundazwe.

USabelo ubanga isikhundla sokuhola i-ANCYL noMgcinimafa we-ANCYL uMnuz Reggie Nkabinde noMnuz Ndumiso Mokako waseMpumalanga.

USabelo wagcotshwa ngisho nawuMengameli we-ANCYL uMnuz Collen Maine wathi ubona kunguyena umuntu ongayisa phambili abantu abasha njengoba yena eseshenxa.

Isifunda esikhulu kunazo zonke eKZN, iTheku, kade saphumela obala sathi seseka uSabelo kwesikamengameli.

Okhulumela i-ANCYL eThekwini, uMnuz Thulisa Ndlela, uthe baphakamisa uSabelo kwesikamengameli ngoba bakholwa wukuthi nguyena ongakwazi ukuxazulula izinkinga ezibhekene nentsha.

Uthe sebefisa ukuthi manje imisebenzi kaSabelo isabalale ezweni lonke.

THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.

Newspapers in Zulu

Newspapers from South Africa

© PressReader. All rights reserved.