ITheku libopha abahweba bengaziwa
WONKE umdayisi wasemgwaqweni onetafula nozidayisela ngezinyawo kufanele abe nephemithi yokuhweba.
Lokhu kushiwo nguMnuz Mandla Nsele, oyiNhloko yoPhiko lwezokuXhumana esabambile kuMasipala weTheku, izolo.
UNsele usho lokhu emuva kokuthi abafundi beSolezwe, abadayisa emgwaqweni kodwa abangenawo amatafula, bekhale ngokuthi abanawo amaphemithi futhi uMasipala weTheku awukaze ubanikeze.
UMnuz Sbusiso Mtshali, ongumdayisi wasemgwaqweni, utshele Isolezwe ukuthi umasipala unikeza abadayisi abanamatafula nalabo abasuke besikelwe izikwele amaphemithi kodwa bona bengenawo.
“Sicela umasipala asicacisele ukuthi thina uhlelo lwakhe lokukhuculula luzosithinta kanjani? Inkinga asinawo amaphemithi futhi umasipala akaze asinike wona noma asazise ukuthi izicelo zabadayisi abangenazo izikwele zitholakalaphi,” kusho uMtshali.
UNsele uthe wonke umdayisi wasemgwaqweni kufanele abe nephemithi.
“Umthetho kamasipala othinta abadayisi basemgwaqweni uthi wonke umuntu owenza lolu hlobo lomsebenzi kufanele abe nephemithi. Ngaphansi kwalo mthetho abadayisi basemgwaqweni bachazwa njengabantu abahweba enkabeni yedolobha, abadayisa emgwaqweni ohamba abantu nezimoto, emakethe, nakuzo zonke izindawo zomphakathi. Kungaba abantu abadayisela ezimotweni ezingomahamba nendlwana noma kube ngabantu abahamba ngezinqola. Kuyicala ukudayisa ngaphandle kwephemithi,” kusho uNsele.
Abadayisi basemgwaqweni kufanele babuze ezikhungweni ezibhekelele ezamabhizinisi eThekwini ukuthi amaphemithi atholakala kanjani baphinde bafunde ngomthetho obathintayo ngokuvakashela i-website kamasipala ku-www. durban.gov.za
IMeya ithe kusukela ngoJuni 18 amaphoyisa azobe enkanise wonke amakhona eTheku naseSiphingo ukuqinisekisa ukuthi bonke abadayisi banamaphemithi.