UKonkco uzolwa phambi kwezihlobo nabangani
UMPETHA we-International Boxing Organisation (IBO) minimumweight, uSimpiwe “Chain Reaction” Konkco, usephupha ngebhande le-World Boxing Council (WBC) asethubeni lokulilwela ungakapheli unyaka.
UKonkco (18-5-0) useqede unyaka agcina ukungena eringini emuva kokuvikela ngempumelelo ibhande lakhe kuLito Dante wasePhilippines ngoJuni nyakenye. Nakuba kumphatha kabi ukungalwi kodwa uveze ukuthi bekuyiqhinga labaphathi bakhe ukuthi angazithathi izimpi ezingenasidingo ukuze ezonyuka ezilinganisweni ze-WBC. UKonkco, oqeqeshwa nguColin “Nomakanjani” Nathan, usekleliswe endaweni yesibili kwabagaqele ibhande le-WBC minimumweight eliphethwe nguWanheng Menayothin waseThailand.
Uzovikela ibhande le-IBO kuToto Landero (10-2-2) wasePhilippines empini ezoba ngoJulayi 22, ngakubo eMthatha. Le mpi izoba seqhulwini kwezihlelwe yiLast Born Promotions, kaZolani Tete, okuhloswe ngazo ukugubha iminyaka engu-100 kwazalwa uNelson Mandela.
Uma uKonkco ewina kuLandero uzonyukela endaweni yokuqala nokuzombeka ethubeni lokubhekana noMenayothin kweyebhade le-WBC.
“Sengibheke ukulwela ibhande le-WBC. Kubuhlungu ukuhlala ungalwi kodwa bengiliqonda iqhinga labaphathi bami. Besixhumana noColin noBerman (Rodney) bangichazela ukuthi uma singazithathi izimpi ngizonyuka ezilinganisweni ze-WBC. Izimbangi ezingaphezulu zizoshayana zodwa zehlele ezansi. Nangempela kwenzeke kanjalo,” kusho uKonkco.
“Manje kufanele nginyukele endaweni yokuqala ukuze ngizolwela i-WBC. Ngijabule kakhulu ngalokhu. Akungifaki ingcindezi ukuthi kufanele nakanjani ngiwine kuLandero. Kule sikhathi engikuso manje ngizitshele ukuthi okufanele kwenzeke kuzokwenzeka. Kubalulekile ukuwina ngoba izimpi azitholakali. Uma uhlulwa ziyakubalekela kakhulu.”
UKonkco uzolwa okokuqala ngakubo emuva kweminyaka eyisihlanu afudukela eGauteng eyothungatha amadlelo aluhlaza. Uzobuyela esengumpetha womhlaba.
UKonkco usebalwa nabashayisibhakela abahloniswayo eNingizimu Afrika. Ekhempini yakhe kukhona umpetha omusha we-International Boxing Federation (IBF) light flyweight ne-World Boxing Association (WBA) super, uHekkie “Hexecutioner” Budler.
“Ngijabule ngendlela engachazeki. Ukuyovikela ibhande lomhlaba phambi kwabangani nezihlobo, kuyinto engachazeki. Ngiyilungele impi ngoba ngiyakuqonda ukuthi ukuwina kuzongibeka kuphi,” kusho uKonkco.