Yizihlabani ezizomela leli eLondon
LIBOPHELE izihlabani iqembu elizomela iNingizimu Afrika kwi-Athletics World Cup ezobanjelwa eLondon, e-England ngoJulayi 14 kuya ku-15.
Phakathi kwabaqokiwe kukhona abagijimi uCaster Semenya, Akani Simbine, Wenda Nel, uLuvo Manyonga odlala i-long jump noSunette Viljoen oyibamba kwi-javelin.
USemenya noManyonga batholela iNingizimu Afrika amagolide kwi-IAAF World Championship eLondon nyakanye. INingizimu iqoke abadlali abangu-40 abazohamba.
Amazwe azoyibamba kwiNdebe yoMhlaba abekwe kwiTop 8 enze ezibukwayo kumaWorld Championship. INingizimu Afrika iqoke umgijimi ngamunye okleliswe phambili emunxeni ancintisana kuwo kwabesilisa nakwabesifazane.
Umengameli we-Athletics South Africa (ASA), u-Aleck Skhosana uthe lo mqhudelwano uyithuba lokuziveza ukuthi elakuleli likephi emizameni yalo yokukhiqiza abagijimi abazobulala izizwe.
“Lawa ngamasosha ethu iningi lawo eselike labhekana nezivivinyo. Sikholwa wukuthi laba bagijimi basezingeni lokulethela izwe ukuhlonishwa elikudingayo. INdebe yoMhlaba iyithuba lokuzihlola ukuthi sikuliphi izinga njengoba sifuna ukubalwa nabaphambili emhlabeni,” kusho uSkhosana esitatimendeni se-ASA.
Kungokokuqala ubakhona lo mqhudelwano owakhiwe amazwe ayisishiyagalombili azobe ebanga ukuba ngumakhonya kwezokusubatha.
Kuzobe kubanga i-United States of America, Poland, China, Germany, France, Jamaica, Great Britain, Northern Ireland neNingizimu Afrika. Yize abagijimi bezozithola izindondo ngabodwana ngokwezindawo abazoqeda kuzona, amaqembu azokwahlulelwa ngokwamaphuzu ngezindawo ezizotholwa abagijimi bawo. Izwe elizoqeda liqoqe amaphuzu amaningi yilona elizogoduka nendebe yomhlaba. Abazomela iNingizimu Afrika Abesilisa: Akani Simbine (100m); Clarence Munyai (200m); Derick Mokaleng (400m); Reinhart van Rensburg (800m); Jerry Motsau (1500m); Antonio Alkana (110mH); Lindsey Hanekom (400mH); Chris Moleya (high jump); Neil Giliomee (Pole Vault); Luvo Manyonga (long jump); Kgotso Mokoena (triple jump); Orazio Cremona (shot put); Victor Hogan (discus); Tshepang Makhethe (hammer throw); Philmar Janse van Rensburg (javelin).
Relay 4X100m: Akani Simbine, Rosco Engel, Simon Magakwe, Henricho Bruinjties noClarence Munyai.
Relay 4X400m: Derick Mokaleng, Thapelo Phora, Pieter Conradie, Zakhitine Nene, Lindsey Hanekom.
Abesifazane: Carina Horn (100m); Justine Palframan (200m); Justine Palframan (400m); Caster Semenya (800m); Caster Semenya (1500m); Rikenette Steenkamp (110mH); Wenda Nel (400mH); Julia du Plessis (high jump); Christy Nell (pole vault); Lynique Beneke (long jump); Patience Ntshingila (triple jump); Ischke Senekal (shot put); Margo Chene Pretorius (hammer throw); Sunette Viljoen (javelin).
Relay 4X100m: Carina Horn, Tebogo Mamatu, Lente Pieterse, Cassidy Williamson, Tasmin Thomas.
Relay 4X400m: Justine Palframan, Caster Semenya, Wenda Nel, Ariane Nel, Rorisang Ramonye.