I-Russia izimisele ngokudla iSaudi Arabia
IRUSSIA engosokhaya kwiNdebe yoMhlaba ka-2018, kuzofanele ifunde emaphutheni enziwa iBafana Bafana ngo-2010, ngesikhathi yehluleka ukunqoba umdlalo wayo wokuvula neMexico owagcina uphele ngo 1-1.
Ukwehluleka kweBafana Bafana ukunqoba umdlalo wayo wokuvula kwayifakela ingcindezi ngo-2010, nokwalandela ngesibhaxu sika-3-0 ithelwa othulini yi-Uruguay emdlalweni wesibili. Sekungumlando ukuthi iBafana Bafana yangena ehlazweni yehluleka ukungena kweyomkhumulajezi ekubeni ingosokhaya.
IRussia izobhekana neSaudi Arabia emdlalweni kaGroup A, eLuzhniki Stadium, namuhla ngo-5 ntambama.
Kuzoyiqinisa idolo iSaudi Arabia ukuthi iRussia ilona lizwe ngokokukleliswa elikude kunawo wonke kwiNdebe yoMhlaba nonyaka njengoba isendaweni ka-70, kanti yona (iSaudi Arabia) isendaweni ka-67. Amanye amazwe akuGroup A, yi-Egypt ne-Uruguay.
“Siyazi ukuthi kasizona izimfivilithi kulo mqhudelwano. Esifuna ukukwenza nje ukudlala kahle nokuqala ngokunqoba kwiSaudi Arabia.
“Asinayo nencane ingcindezi ngoba siyazi ukuthi yini elindeleke kithina,” kusho uStanislav Cherchesov ongumqeqeshi weRussia.
ISaudi Arabia izobe ibheke isipiliyoni sikaJuan Antonio Pizzi ozocija leli zwe ongumakadebona kwezokuqeqesha. UPizzi udabuka e-Argentina. Useke wacija iqembu lesizwe laseChile anqobe nalo isicoco seCopa América ngo-2016. Useke wacija amaqembu amaningi okubalwa kuwona iValencia yaseSpain namanye.
Izolo iSpanish Football Federation imemezele ukuthi seligqabukile igoda phakathi kwalo nomqeqeshi uJulen Lopetegui. Lezi zindaba zithuse abantu abaningi njengoba ukumenyezelwa kokuxoshwa kwalo mqeqeshi kwenzeke sekusele usuku kuqale iNdebe yoMhlaba. ULopetegui ukhonjwa kwiReal Madrid uma kuqala isizini entsha.
Ngaphambi kokuqala komdlalo wesokhaya neSaudi Arabia kuzoba nendumezulo yomcimbi wokubungaza le midlalo ozobanjelwa khona eLuzhniki Stadium. Kulindeleke abaculi uRobbie Williams wase-United Kingdom nabaculi be-opera uPlacido Domingo waseSpain, Luciano Pavarotti wase-Italy noJose Carreras naye waseSpain, bashiyelane inkundla.
Ingoma okuyiyona ebungaza le midlalo esihloko sithi “Live It Up” nayo izoculwa ngaphambi kokuqala komdlalo. Le ngoma iculwa uWill Smith ngokubambisana noNicky Jam no-Era Istrefi.
Imidlalo yeNdebe yoMhlaba kule mpelasonto kuSS3: Namuhla: Russia v Saudi Arabia (5pm,). Kusasa: Egypt v Uruguay (2pm); Morocco v Iran (5pm); Portugal v Spain (8pm). NgoMgqibelo: France v Australia (11.45pm); Argentina v Iceland (5.45pm); Peru v Denmark (5.45pm); Croatia v Nigeria (8.45pm). NgeSonto: Costa Rica v Serbia (1.45pm); Germany v Mexico (4.45pm); Brazil v Switzerland (7.45pm).