U-AKA uvalelisa ngeveza impilo yakhe yasesithe
UMREPHA ovutha engabaselwe ngomculo nangezinto azenzayo endimeni yezokungcebeleka, u-AKA ufuna ukushiya abalandeli bakhe bemuzwa ngaphakathi. Lokho kuzwakala ngemuva kokulalela i-albhamu yakhe eqale ukutholakala ezitolo namhlanje. Lo mrepha ogama lakhe nguKiernan Forbes namhlanje ukhiphe i-albhamu yakhe, aveza ngoMashi ukuthi eyokugcina, iTouch My Blood.
Engxoxweni neSolezwe uveze ukuthi njengesihloko sayo, ufuna abantu bezwe yena uqobo kule albhamu.
“Ngifuna ukuthinta impilo yabantu nokuthi abantu bezwe izinto engidlule kuzo empilweni yami yangasese ngokunjalo nasendimeni yomculo. Ngijabule kakhulu ngezinga le-albhamu futhi ngiyethemba abantu bazoyithakasela kakhulu,” kuchaza lo mrepha.
Phakathi kwamaculo asewakhiphile akule albhamu kubalwa iCaiphus Song, The World is Yours, Sweet Fire, Beyonce, neStar Signs. Kuwo wonke lawa maculo kuqaphelekile ukuthi ubeseqalile eveza okuningi okwenzeka empilweni yakhe yangasese. IBeyonce kamuva nje isuse umsindo kwazise kuyo uzwakala sengathi ucula ngowayeyisinqandamathe sakhe uBonang Matheba, ahlukane naye ekupheleni konyaka odlule. Njengoba engumrepha obuye aphrojuse, u-AKA uthe akukaze kube yinto yakhe ukungasebenzi nabanye ophrojusa. Nakulena usebenze nenqwaba. Kubo kubalwa uTweezy, Maphorisa, Gemini Major, Makwa, JR, Kiddominant, Anatii, noMaster A Flat.
Emacikweni awapikile kubalwa uStogie T, Okmalumkoolkat, Yanga, Kwesta namanye.
Njengoba kuvele ukuthi lo mrepha usekhipha i-albhamu yakhe yokugcina, uthe uzimisele ukuyiphusha bese egxila enkampanini yakhe iBeam Group.
“Ngaphandle kokuba ngumculi ngiwusomabhizinisi endimeni yezobuciko. IBeam Group ngayisungula ngemuva kokuhlukana neVth Season. Kuningi esikwenzayo, sisazokhiqiza namaciko okuzobaluleka ukuthi ngiwanikeze isikhathi sami ukuze azinze endimeni,” kusho u-AKA.