Ithimba elizophenya ngezase-Adams College
UMNYANGO wezeMfundo KwaZuluNatal usunxuse abanolwazi ngezinsolo zocansi phakathi kwabafundi nothisha base-Adams College ukuthi beze ukuze basize ngophenyo.
Umnyango ujube ithimba elizophenya lezi zinsolo ezisabalele kwabezindaba nasezinkundleni zokuxhumana ngothisha okuthiwa banobudlelwano nabafundi.
UMnuz Kwazi Mthethwa, okhulumela uNgqongqoshe wezeMfundo uMnuz Mthandeni Dlungwane, uthe bajube izikhulu zomnyango ukuthi zithole ulwazi mayelana nalezi zinsolo.
Uthe izinsolo zibucayi futhi bafuna ukuthola ubuqiniso bazo.
“Asifuni kube nomfundi ohlukumezekayo ezikoleni zethu. Uphenyo yilona oluzoveza ubuqiniso balezi zinsolo,” kusho uMthethwa.
Uthe okwamanje abantu basabalalisa izinto abangenabo ubuqiniso bazo.
“Yingakho sithi ulwazi alulethwe emnyangweni ngoba okwamanje yinto esatshalaliswayo asibazi ubuqiniso bayo. Sifuna ukuvikela abafundi,” kusho yena.
I-IFP inxuse ukuthi kwenziwe uphenyo olunzulu mayelana nalezi zinsolo.
Okhulumela i-IFP kwezemfundo, uNkk Thembeni Madlopha-Mthethwa, uthe umnyango kumele ubathathele izinyathelo othisha abathintekayo.
“Kuyihlazo ukuthi kunothisha abanquma ukucekela phansi ikusasa lezingane ekubeni ngabe bakha ikusasa lazo. Umnyango awusebenzise bonke ubufakazi ozobuthola ukuthathela izinyathelo abathintekayo,” kusho yena.
Uthe kumele banekelwe izwe othisha abenza into efuze le ngoba kumele ngabe bayisibonelo esihle.
Ezinkundleni zokuxhumana abafundi bakhuluma ngalezi zehlakalo bafuna umnyango uthathe izinyathelo.
Lesi sikole saziwa ngomlando waso omuhle njengoba kwafunda abaholi abahlonishwayo kuleli okubalwa nomengameli bakwamanye amazwe.
Kwabanye abafunda khona kubalwa umengameli waseBotswana uMnuz Milton Obote nowase-Uganda uSir Seretse Khama, uNgqongqoshe ehhovisi likaMengameli uDkt Nkosazana Dlamini Zuma, umholi we-IFP inkosi Mangosuthu Buthelezi, umholi we-ANC uDkt John Dube nabanye abaholi.
Ezinkundleni zokuxhumana kusetshenziswa i-#AdamsCollegeTrashyTeachers, #SaveAdamsCollegeFromPaedophiles nethi #SaveOurGirls ukusabalalisa umyalezo.