Kuxwayiswa ababhukudi njengoba esusiwe amanethi

Isolezwe - - IZINDABA - BONISWA MOHALE

ABE-KZN Sharks Board bagqugquzele umphakathi ukuthi ulalele abaxwayisa abantu ngokubhukuda emabhishi njengoba esesusiwe amanethi avimba oshaka emabhishi aseNingizimu yeKwaZulu-Natal, kwazise osayidinsi sebeqalile ukubonakala.

UMnuz Mike Anderson-Reade weKZN Sharks Board, esitatimendeni uthe sekuyisikhathi sokufika kosayidinsi kanti amanethi avimbela oshaka ukuthi beze osebeni asusiwe emabhishi ukuze osayidinsi nezinye izilwane ezihambisana nabo njengamahlengethwa zihambe ngokukhululeka.

Uma kuza osayidinsi amanethi ayasuswa ngoba uma ehleli izilwane ezihambisana nabo ziyabhajwa emanethini zigcine sezifa kanti nosayidinsi abahambi ngokukhululeka.

“ISharks Board izoqhubeka nokuqapha isimo ngokusebenzisana nomasipala abanamabhishi ukuqinisekisa ukuthi abantu baphephile kanti nosayidinsi bahamba ngokukhululeka,” kusho u-Anderson-Reade.

Uthe osayidinsi babonakele eRamsgate, eMthwalume naseMthethweni. Uveze ukuthi amahlengethwa namaCape Gannets okuyizinyoni ezihambisana nosayidinsi nazo ziboniwe ngaseMazeppa Bay yize bezingeziningi.

Osayidinsi baheha inqwaba yezivakashi ezisuke zifuna ukubadoba kanti ezinye zisuke zijabulela ukubona amahlengethwa, izinyoni nezinye izilwane ezisuke zijaha osayidinsi.

Abanikazi bamahhotela agudle ulwandle nabo sebeqalile ukukhangisa ngezindawo zokuhlala koMargate, Ramsgate, eThekwini, nakwezinye izindawo.

Newspapers in Zulu

Newspapers from South Africa

© PressReader. All rights reserved.