Ufuna simbiwe isidumbu sendodana ‘eyazilengisa’
IFUNA simbiwe isidumbu sendodana yayo eyashona emuva kokuzihilela ngo-2015 indoda ethi isithole ulwazi olusha ngokuthi yabulawa.
UMnuz Timothy Ntshalintshali (56) waKwaNongoma utshele Isolezwe ukuthi ukumbiwa kwesidumbu sihlolwe kabusha kuzokhulula umoya wakhe ngokushona kwendodana yakhe, uLindokuhle (26).
Elandisa Isolezwe uthe ngo2015 wathintwa esemsebenzini eRusternburg mayelana nokuzihilela kwendodana yakhe.
Uthe asizange sivele isizathu sokuzihilela kwayo njengoba yayingekho incwadi nesikhalo eyayinaso.
Uthe okwamumangaza ukuthola ulwazi emuva kokungcwaba ukuthi indodana yakhe yashaywa kwenye indawo yabe isilethwa izobekwa lapho yatholwa ilenga khona.
“Sengenze konke ukulandela umthetho ukuze icala lendodana yami livulwe kabusha kulandela ukuthola ukuthi ayizange izihilele kodwa yashaywa yabe isibekwa. Ngiyile emaphoyiseni,abaphethe amaphoyisa kodwa angilutholi usizo. Ukumbiwa kwesidumbu, sihlolwe kwabusha okuzokhulula umoya wami, necala livulwe kabusha,” kusho uNtshalintshali.
Okhulumela amaphoyisa KwaZulu-Natal uLt. Col. Thulani Zwane uthe sekukaningi bezama ukusiza uNtshalintshali ngaleli cala. .
“Isiteshi saKwaNongoma nesiteshi sasoLundi sekukaningi bezama ukuxhumana noNtshalintshali mayelana nodaba lokuzibulala kwengane yakhe. Okwamanje abukho ubufakazi obusha esisabutholile obungenza sikwazi ukuvula icala elisha lokubulala. Icala lokubulala alikaze livulwe njengoba ukuhlolwa kwesidumbu kwakhombisa ukuthi uLindokuhle wazibulala ngokuzilengisa,” kusho uZwane.
UNtshalintshali ethintwa ngokushiwo ngamaphoyisa uthe awukho umnyango angawuhambile futhi ubexhumana namaphoyisa kodwa bengamgculisi ngezimpendulo.
“Size saya nakudokotela owahlola isidumbu. Wangitshela, kukhona nawo amaphoyisa ukuthi isidumbu akazange asivule ukuze asihlole kodwa wasibuka wabe eseqinisekisa okwakushiwo amaphoyisa ukuthi uzibulele,” kusho uNtshalintshali.
Uthe okwenza izinsolo zakhe ziqine yindlela isidumbu sendodana yakhe esatholwa ngayo.
“Ngokusho kwababona isidumbu sasiphezu kwebhentshi, isikhathi esiningi uma umuntu ezibulala ngokuzilengisa, uyakhahlela lokho asuke emi kukhona. Intamo yaphuka futhi eshayiwe,” kusho uNtshalintshali.