OwoZalo udlala indawo eqavile kokaCetshwayo
UMLINGISI woZalo uzodlala indawo eqavile emdlalweni weshashalazi okhuluma ngempilo yeSilo uCetshwayo. UNhlakanipho Maphumulo odabuka eMatikwe, eNanda uzobe elingisa indawo yowayeyinduna kaCetshwayo, inkosi uMnyamana kaNgqengelele Buthelezi.
Lo mdlalo obizwa ngeKing Cetshwayo, The Musical uzokhonjiswa ePlayhouse Drama Theatre eThekwini kusukela ngoJuni 20 kuya kumhla ka-23.
UNhlakanipho (33) uthe uzizwa ehloniphekile ukunikezwa le ndawo ngoba ukhuluma ngeqhawe elalihlonishwa kakhulu nelinomlando esizweni sakwaZulu. “Lokhu kusho inhlonipho enkulu enginikezwe yona ngabadidiyeli balo mdlalo futhi kungenze ngafuna ukwazi kabanzi ngokuthi kwakuwubani uMnyamana, ngathola ukuthi akusiyo indawo elula.” Ebuzwa ukuthi angakujabulela yini ukulingisa le ndawo kukhona nomzukulu kaMnyamana, uMntwana waKwaPhindangene uDkt Mangosuthu Buthelezi oyinduna kaZulu, uNhlakanipho uthe engazizwa ebusisekile.
Lo mlingisi odlala indawo kaQinisela kuZalo akasilo ivukane njengoba eseke walingisa emdlalweni owawuxoxa ngomlando wenkosi u-Albert Luthuli othi Let My People Go, Dinuzulu, Peace In The Valley.
“Nasemdlalweni ngeSilo uDinuzulu ngangilingisa indawo yenduna enkulu.”
UNhlakanipho usevamise ukubonakala emidlalweni ekhonjiswa kuMzansi Magic okubalwa kuyo ethi Isitha nothi Itshitshi. “Khona maduze ngizobonakala kothi Balungile, ngilingisa indawo kababa kaBalungile, uJethro.”
Le nsizwa yaqeqeshwa kabanzi ngumakadebona ongasekho uBhoyi Ngema ngaphansi kweMbongeni Ngema Academy.
“Ngabuye ngafundisa kulesi sikhungo ngaphambi kokubonwa nguJerry Pooe ongumdidiyeli weKing Cetshwayo, The Musical.” UNhlakanipho uphothule uGrade 12 eNtabinamafutha High KwaNyuswa, eNdwedwe. IKing Cetshwayo ikuthatha ikubeke ngempi yaseSandlwana eyayiphakathi kwamaNgisi noZulu ngo-1879. Umculo kulo mdlalo uqondiswe yingwazi ye-world music uMbuso Khoza. UPooe uthe lo mdlalo wakhonjiswa okokuqala eWales e-UK ngesikhathi kuphela iminyaka engu-135 kwabakhona le mpi. Uthe inhlosongqangi ngalo
mdlalo ukuveza umlando okuyiwo wamaZulu ukuze intsha ingafunzwa ushevu ngezinye izinhlanga.
Lo mdlalo ukhiqizwe esikhungweni sezobuciko saKwaNgcolosi iWushwini Pan African Centre for Arts, Culture and Heritage ngokubambisana nePlayhouse Company noMnyango wezobuCiko namaSiko KwaZuluNatal. Amathikithi okuthamela lo mdlalo, oqala ngo-7 ebusuku, aseyatholakala ngoR50 kumacomputicket nasePlayhouse.