IHonda Jazz Sport ithusa ngobuhle

Isolezwe - - EZEZIMOTO - FANELESIBONGE BENGU IMOTO: HONDA JAZZ SPORT

KUNABANTU noma izinto othi uma uqala ukuzibona uvele uzithande nje zisuka ngenxa yokuhehwa wubuhle bazo.

Ngicabanga ukuthi zimbalwa kabi izinsizwa ongathi uma uzikhombisa isithombe sikaBeyonce zithi azimfuni. Nasezimotweni bengaba yingcosana, uma bengaba khona, abangeke babuncoma ubuhle beHonda Jazz Sport. Yona lena ebesihamba ngayo ebomvu, yinhle kakhulu ngombala wayo ogqamile.

Ibukeka ithe ukuba banzi kunendala yabe isikhasa phansi. Ngaphambili ishaya ngama-LED headlights anamaLED daytime running lights namakhava ezibuko amnyama acwebezelayo. Ebhampini ngezansi ngaphambili kunamafog lights. Inamarimu angu-16 inch ayenza ibe yinhle amnyama. Ngemuva ine-spoiler esiyenza ibe sporty kanjalo ne diffuser esinombala obomvu njengowesplitter ngaphambili..

Ngaphakathi bayakhe yaba yinhle futhi yaba yimoto yesimanje ngenxa yokuthi ayinawo amabhathini.

Kune-touchscreen engu-7 inch okuyilapho khona ukwazi ukulawula i-infotainment system ehlanganisa umsakazo odlala iCD, Bluetooth, HDMI uxhume iselula ngeBluetooth futhi iveze ikhamera ngemuva uma uhlehla. Mhlawumbe ngenxa yenani lemoto ubungakulindela ukuthi ibe nenkombandlela noma ixhume iselula nge-Apple CarPlay okanye i-Android Auto. Lokhu ngikusho ngiqhathanisa nezimbangi ezifana neVW Polo neFord Fiesta.

Eduze kwayo kunenkinobho yokuyidumisa noma ukuyicima njengoba uyidumisa noma ukhiye usephaketheni. Nokungena nokuyikhiya awudingi ukuciphiza ukhiye kodwa kumele iwuhogele ukuthi useduze.

Iphinde ibe nezinkinobho esiteringini ezilawula umsakazo, ukubamba ucingo ne-cruise control. Okunye enakho ngaphakathi amawindi kagesi, i-aircon ezisethayo ukuthi ibande noma ishise kanjani nokunye.

Ungadidwa yigama iSport bese uzitshela ukuthi ishaya ngejubane lonyazi ngoba akunjalo. Empeleni yilapho iphoxa khona le moto. Injini eyithwalayo yi-1.5 litre iV-TEC enamandla angu-97 kW netorque engu-155 Nm.

Kutholakala eno-gearbox ozishintshayo kuphela oyiContinuosly Variable Transmision (CVT). Ngebanga lika-100 km bathi isebenzisa amalitha angu-5.6 nokuyinombolo ebengingasondeli kuyo ngoba ngezinsuku eziyisikhombisa engizichithe nayo beyilokhu idla ngaphezulu kuka-6.

Uma uyinyathela ivele ibe yisindandanda esinomsindo omkhulu wenjini ngaphakathi. Lokhu kwenzeka uma usuka ngejubane noma ufuna ukudlula enye imoto. Uma kodwa uzisukela kahle nayo iyazithulela nokuyenza kube mnandi ukuhamba ngayo edolobheni elinesiminyaminya ngoma awulokhu ushintsha amagiya.

Uma ufuna ukuzishintshela amagiya uyifaka ku-sport bese ushintsha kuma-paddle shift ngemuva kwesiteringi nawo akukhumbuzayo ukuthi akusiyo imoto yejubane ngoba kuphela isikhashana ngaphambi kokuthi ifake igiya olikhethile. Ivulekile ngaphakathi okwenza abagibeli bahlale kahle ngisho abangemuva abanodedangendlale wesikhala.

Yimoto ekahle yomndeni ohlala emadolobheni. Ibhuthi ingu-359 litre kodwa uma ulalise izihlalo zangemuva liba ngu-889 litres.

Kwezokuphepha ifika namabhreki e-ABS, EBD, Emergency Stop Signal, Vehicle Stability Assist neHill Start Assist. Inamaairbag ayisithupha ahlanganisa awangaphambili, eceleni namacurtain airbags. Inani Honda Jazz Sport R312 900

Ifika ne-warranty yeminyaka emihlanu noma u-200 000km, iservice plan yeminyaka emine noma u-60 000km, ne-AA Roadside Assistance yeminyaka emithathu.

Kumele uyise kwisevisi njalo ngemuva kokuhamba u-15 000km.

Newspapers in Zulu

Newspapers from South Africa

© PressReader. All rights reserved.