Umthetho uvikela ukuhlukunyezwa kwabantu
NJENGOMUNTU owabizelwa kwindima yezomthetho ngibone kubalulekile ukuthi ngisike elijikayo, ngimemeze ngithi, sekwanele ngokuhlukunyezwa kwabantu, ngokukhethekile abasifazane nezingane.
Ngiphinde ngiphose esivivaneni ngokuqwashisa isizwe ukuthi umthetho ungawusebenzisa kanjani ukuthi ulwe nokuhlukunyezwa uphinde ukwazi ukuvikela impilo yakho.
ENingizimu Afrika sinoMthethosisekelo oqiniseka ukuvikelwa kwamalungelo abo bonke abantu abaphila ezweni lethu. Lezi zigaba ezilandelayo esesishiyagalombili (8), esesishiyagalolunye (9) neseshumi (10) ziqinisekisa ukuvikelwa kwamalungelo ngokulinganayo okungakhethi bulili. UMthethosisekelo unomsebenzi omkhulu wokulungiselela ukuphasiswa kwemithetho ezohambisana nokuvikelwa kwamalungelo njengalawa abalulwe ngaphezulu.
Ukukhombisa ukubaluleka kwalezi zigaba zoMthemthosisekelo waseNingizimu Afrika, uhulumeni uphasise umthetho owaziwa ngokuthi i-Domestic Violence Act wesi-116 ngonyaka ka 1998, nomthetho obizwa ngokuthi iProtection from Harassment Act 17 of 2011.
Le mithetho ebalulwe ngaphezulu yakhelwe ukuvikela nokuvimbela ukuhlukunyezwa kwabantu ngokushaywa, ngokocansi, ukusatshiswa, ukulinyazwa kwempahla, ukulandelwa okusamfihlo, ukuthukwa, ukululazwa, ngokuncishwa imali ngenhloso yokuzwiswa ubuhlungu noma ukucindezela.
Okufanele ukwazi ukuthi le mithetho ayichemile futhi ivikela wonke umuntu, okubalulekile ukuthi kufanele isetshenziswe ngendlela.
Izikhungo zamaphoyisa, izinkantolo nezikhungo okuthiwa amaThuthuzela Centre ezakhelwe ukusiza nokululeka abasuke bebhekene nenkinga yokuhlukunyezwa.
Kuwumgomo nelungelo lakho ukuthi ilungu lamaphoyisa likwazise ngamalungelo akho liphinde likusize ukuvikela lawo malungelo.
Kulindeleke ukuthi usayine incwadi efungelwe (affidavit) esuke ichaza kabanzi ngokuhlukunyezwa kwakho.
Uma usafake isicelo kulezi zikhungo ezibalulwe ngaphezulu, umthemtho uqinisekisa ukuvikelwa kwakho ngokushesha okwesikhashana phecelezi lokhu okuthiwa i-interim protection orders.
Lokhu kuvikelwa kwesikhashana kuvunywa uma ufake isicelo esichaza ngokuhlukunyezwa kwakho. Ingakho kubalulekile ukuthi uphathe imininingwane ephelele ngokuhlukumezayo nemininingwane nobufakazi bokuhlukunyezwa kwakho.
Kuyobe sekuba amaphoyisa azohamba, ahambise umyalezo wokuphuma nemibandela yencwadi yesivimbelo sesikhashana kulo osolwa ngokuhlukumeza. Incwadi izoba nosuku enibizelwa ngalo enkantolo ukuthi kuzothulwa ubufakazi bokuthi kungani imibandela equkethwe incwadi yesivimbelo kufanele ishintshe ekubeni eyesikhashana ibe ngeqinisekiwe (final order).
Amaphoyisa anelungelo lokushaqa izikhali zosolwa ngokuhlukumeza, lokhu kwenzela ukuthi kuvikelwe impilo.
Inkantolo isebenza ngobufakazi ngakho ukuletha nokuchaza kabanzi ngezikhalo zakho nofakazi kwenza isicelo sakho sokuvikelwa ukuthi siqine nobulungiswa benzeke.
Ngosuku enizobizwa ngalo enkantolo kufanele ufike nofakazi, uma bekhona, abazothula ubufakazi obuqinisa izinsolo zakho njengommangali.
Uvumelekile ukudlulisela icala lakho enkantolo ephezulu noma engaphezulu uma ungajabulanga ngesinqumo senkantolo osuke okuyona.
Inhloso yale mithetho ukuvikela impilo nokuqiniseka kokuvikelwa kwamalungelo abantu ikakhulukazi abesifazane nezingane.
Ukuzivikela nokuthanda impilo yakho kuqala ngawe wena ohlukunyezwayo, ukuhlala ethembeni lokuthi umhlukumezi wakho uzoshintsha usuke udlala ngesikhathi uphinde uzifake engcupheni yokulimala noma ukulahlekelwa impilo yakho.
Kanjalo wena ohlukumezayo ungalithola usizo kusenesikhathi. Izikhungo ezisiza abantu ukuthi bayeke ukuhlukumeza zikhona, thola usizo ungakawukhiphi umphefumulo womuntu ongenacala nawe ungakalilimazi ikusasa lakho.
Sisho siphindelela sithi sekwanele, alikho ikusasa nobuntu obakhiwa ukuhlukumeza omunye umuntu. Ummeli angakusiza ukuchaza kabanzi nangokufaka isicelo sesivimbelo enkantolo eseduze nawe.
UMnuz Mpumelelo Zikalala unguMqondisi weZikalala Attorneys ( Abameli), Zikalala Corporation, Wikilli PTY Ltd and Zikalala PTY Ltd.