OweSibaya uvume eyesisu sowoZalo
UMLINGISI weSibaya uJessica Nkosi odlala indawo kaQondi ugcine ephumele obala ngokuthi ukhulelwe ingane yentombazane futhi uthandana noyise wengane yakhe ongumlingisi woZalo, uNtokozo Dlamini odume ngelikaMastermind.
Ukusho lokhu engxoxweni ekhethekile nephephabhuku lesiNgisi eliphuma kanye ngenyanga.
Ngemuva kwezinyanga kuvele amahlebezi okuthi le ntokazi izithwele kuthe izolo yaziqinisekisa lezi zindaba ku-Instagram. Kuleli phephabhuku kuvele ukuthi uJessica uzocacisa ngothando lwakhe nalo mlingisi aphinde akhulume ngokukhulelwa kwakhe.
Ekhuluma ngalezi zindaba uJessica uthe ubengazami ukufihla ukukhulelwa kwakhe kodwa naye ubesajabulela ukuzwa lezi zindaba.
“Bengifuna ukujabulela ukuba sebudlelwaneni bezothando ngaphandle kokuba uthando lwethu lube semehlweni omphakathi,” kuchaza uJessica.
Uthe akukho zehlakalo ezikhona ezithinta ukukhulelwa kwakhe futhi akafuni zibe khona.
“Angifuni kube khona abaphawula ngokukhulelwa kwami,” kuphawula le ntokazi kuleli phephabhuku.
Nasemakhasini akhe ezinkundleni zokuxhumana i-Instagram neTwitter ubhale okufanayo.
“Ngiyaxolisa kakhulu ngokuthi bengithule futhi nginishiye ebumnyameni. Bengibhekene nezinto ezimbalwa ngase ngithatha isinqumo sokuhlaba ikhefu ukuze ngibe sesimeni kodwa sengingcono kakhulu manje,” kubhala uJessica.
Uthe ufuna ukuvezela abantu isibusiso asiphiwe nguNkulunkulu
“Kumele nginibonge ngokungithanda ngokungaphezi nokungeseka. Ngiyanithanda futhi ngiyabonga,” kubhala le ntokazi.
Lezi zithandani ziyaqala ukuqinisekisa lezi zindaba njengoba uJessica esephumele obala. Kodwa Isolezwe lake lababona bendawonye emcimbini wakwaM-Net kwethulwa uhlelo iDancing with the Stars SA, ekuqaleni kwalo nyaka. Babehamba nabangani babo emcimbini owawuseHyde Park.
Nangesikhathi uJessica egubha usuku lwakhe lokuzalwa eViews at Twenty5 wayekhona uNtokozo kanti noJessica wayekhona emcimbini wokugubha usuku lokuzalwa kukaNtokozo owawuse-47th Avenue eThekwini ekuqaleni konyaka.
UNtokozo wanqaba ukuphawula ngobudlelwano babo ngesikhathi ebuzwa yiSolezwe.
Abantu bayibongele le ntokazi ezinkundleni zokuxhumana ngemuva kokuveza lezi zindaba.
Osaziwayo okukhona kubo uPearl Thusi, AKA, Sdumo Mtshali, Bridget Masinga noMiss Pru bahalalisele le ntokazi ngesibusiso sayo.