Udutshulwe belamulela umngani obehlaselwa
UFUNA kuboshwe abasolwa umndeni womfundi oneminyaka engu-24 odutshulwe emini kabha eLindelani phambi kwabafowabo elamulela umngani wabo.
USanele “Ngogo” Zondo obefunda uGrade 11 eGugulabasha High udutshulwe ngeSonto emini kubuka abantu KwaNdlazi erenki khona eLindelani.
Ngokusho komfowabo, uMnuz Msizi Zondo obekhona kwenzeka isigameko, babehamba bebahlanu beyobuza igama losolwa ngokugwaza umfowabo omncane uManelisi ngesikhathi behlaselwa. UManelisi kuthiwa wagwazwa ngebhodlela ebusweni ngoMgqibelo ngumsolwa ongaziwa ngaphandle kwesizathu.
“Sasihamba ngemoto umngani wethu wehla eyobuza igama losolwa ngokugwaza umfowethu ngebhodlela ebusweni, sasifuna ukuya emaphoyiseni siyobika sesiliphethe igama lomsolwa ukuze aboshwe. Abafana esasibuza kubona bahlasela umngani wethu kwathi sesiyolamula kwavele kwaqhamuka iqulu labafana lihlome ngezibhamu lasidubula. Inhlamvu yangigeja, umfowethu bamdubula ekhanda ngibuka, washonela khona lapho,” kusho uZondo.
Uthe abazi ukuthi kungani ababephethe izibhamu bebahlasele.
“Ngabe kungcono ukuba sikhuluma ukuthi sasilwa njengoba besidubulile kodwa akunjalo bavele baqhamuka sebesidubula nje ngaphandle kokubuza,” kusho uZondo. Uninalume kamufi uMnuz Bheki Ntshangase uthe kwenzeka lokhu nje basemanzini njengoba ubabekazi kamufi kulindeleke ukuba afihlwe namhlanje. “Uyise walezi zingane ushone ngonyaka odlule ngo-Agasti njengoba unina esazilile, ngaphezu kwalokhu kwenzeka lesi sigameko kushoniwe njengoba kuzongcwatshwa ngoLwesibili (namhlanje). Kunzima ukwamukela okwenzekile. Esikufunayo wukuba abasolwa baboshwe ukuze bajeze ngabakwenzile,” kusho uNtshangase.
Umufi uchazwe njengomuntu obezithulela ethanda imfundo njengoba ngo-2014 waqeda u-matric kodwa wangaphasa kahle. Emuva kokubamba amatoho iminyaka emithathu wakhetha ukubuyela esikoleni kulo nyaka eyoqala uGrade 11.
“Isikole ubesikhonze kakhulu njengoba ebuyele yize esemdala. Kuyadumaza ukuthi abulawe ngale ndlela ngoba ubenekusasa eliqhakazile,” kusho uNtshangase.
Okhulumela amaphoyisa KwaZuluNatal, uColonel Thembeka Mbele, uthe amaphoyisa aseNtuzuma aphenya icala lokubulala emuva kokuba kudutshulwe owesilisa oneminyaka engu-24.
“Imbangela yokubulawa kukamufi ayaziwa, uphenyo lwamaphoyisa lusaqhubeka,” kusho uColonel Mbele.
Isolezwe lithole ukuthi KwaNdlazi erenki sekuphenduke kwajombigazi njengoba kujwayele ukuba nezigameko zokuhlaselwa kwabantu.
Umfowabo kamufi, uManelisi, naye wagwazwa kule ndawo ngoMgqibelo okuyisigameko esiholele kwesokubulawa kukamfowabo.
Isolezwe lithole ukuthi kule ndawo kudliwa izidakamizwa emini kabha, kanti amaphara ayazicanasela nje.