Bamisiwe ekukhipheni abakolindela
Abakhishiwe kuthiwa bonke bebenezincwadi ezibagunyaza ukuthi bahlale ezindlini kodwa amalungu e-Anti Land Invasion Unit (ALIU) kuthiwa awazange akushaye mkhuba lokho.
Inkantolo ikhiphe umyalelo wokuthi umasipala ungaqhubeki nokukhipha abanye abantu, ngaphezu kwalokho asebekhishiwe ababuyiselwe ezindlini abebehlala kuzo.
Kuthiwa ezindlini zabakhishiwe kufakwe abadilizelwe imijondolo yabo eKuthuleni.
Okhulumela Abahlali baseMjondolo, uMnuz Thapelo Mohapi, uthe akekho umhlali okhishiwe obengenalo iphepha elimgunyazayo ukuthi ahlale. Abanye uthe banamaphepha abawathola ngo-2008 kuwo umasipala ngesikhathi kudilizwa imijondolo yabo, bathenjiswa ukuthi bazokwakhelwa imizi yomxhaso. Umasipala wathi abagobe amadlangala bayoze basuswe uma sekwakhiwe izindlu zabo zemixhaso. Abanye uthe banezincwadi abazinikwa ngamakhansela phambilini ngemuva kokusha kwemijondolo yabo noma ngemuva kokuguguleka kwayo.
Okwenziwe ngumasipala kuyaphambana nomthetho, awukwazi ukukhipha abantu asebehlale ezindlini iminyaka engaphezulu kwemihlanu uthi abahlale esingangeni. Umthetho uthi uma kunesizathu esinqala sokuthi bakhishwe kumele ubanikeze enye indawo abazohlala kuyo. Siyajabula ukuthi inkantolo ivune thina,” kusho uMohapi.
Inkantolo inikeze umasipala amahora awu-24 uma ufuna ukuphikisa umyalelo wayo.
lnhloko yezokuxhumana ebambile kuMasipala weTheku, uMnuz Mandla Nsele, uthe umasipala ubengakaziswa ngomyalelo wenkantolo ngakho ngeke baphawule ngawo. Uthe imindeni ekhishiwe beyingenawo amaphepha eyigunyaza ukuthi ihlale kule ndawo.
“ILamontville inohlelo lokwakhiwa kwezindlu okulindeleke ukuthi kuhlomule kulo abantu abahlala eBarcelona, eWalter Sisulu naseKuthuleni. Le ndawo isetshenziselwa ukuhlalisa okwesikhashana imindeni esuke isuswe emijondolo yayo ngoba seyizokwakhelwa izindlu kulolu hlelo,” kusho uNsele.
Uthe abasebenzi babo abazange bakhulume amagama obuhlanga ngesikhathi kukhiswa abebehleli ezindlini ngokungemthetho njengoba kushiwo.