URamaphosa uzimisele ukubona iSilo
UMENGAMELI Cyril Ramaphosa uthi uzimisele ukubonana neSilo, uGoodwill Zwelithini kaBhekuzulu, ukuxoxa ngekusasa leNgonyama Trust Board, esengcupheni yokuhlakazwa yiPhalamende.
Lokhu kuqinisekiswe nguNkk Khusela Diko, okhulumela uRamaphosa, othe umengameli akanawo amandla okuvimba iziphakamiso ezenziwe ngeNgonyama Trust njengoba udaba lwayo luphambi kwePhalamende.
Isilo sifuna uRamaphosa asichazele ukuthi kungani Ingonyama Trust ihlaselwa emva kokuthi ikhomishini eyayiholwa owayengumengameli, uMnuz Kgalema Motlanthe, yaphakamisa ukuthi mayihlakazwe.
“Asikaze sisithole isimemo seSilo kodwa umengameli uyakuthokozela ukuxoxisana nabo bonke abantu ngisho neSilo ngodaba oluthinta ukubuyiswa komhlaba. Uzosamukela isimemo esinjena. Ubengakaphawuli ngeziphakamiso zikaMotlanthe ngoba uzolinda iPhalamende,” kusho uNkk Diko.
Umeluleki weSilo kwezoMthetho ophinde abe nguSihlalo weNgonyama Trust Board, uJaji Jerome Ngwenya, uthe bamatasa babhala incwadi yokucela umhlangano nomengameli.
Uthe uma uhulumeni engaluxazululi udaba lweNgonyama Trust, iSilo sizoya enkantolo ukuvikela umhlaba ukuthi uthathwe wuhulumeni.
Uthe uyaqhubeka nomkhankaso wokuqoqa imali yecala lokuvikela umhlaba.
Isilo samemezela ukuthi sinxusa abantu besizwe samaZulu ukuba banikele ngoR5 ukusiza isizwe ukuthi sivikele umhlaba waso.
“Abantu bayanikela yize singazi ukuthi sekungene malini,” kusho uNgwenya.
Ingonyama Trust iphethe umhlaba ongu-2.8 million hectares KwaZulu-Natal.
“Abantu bakhathazekile, bafuna ukwazi ukuthi kwenzekani ngeNgonyama Trust. Abantu abathandi ukungazi ukuthi kwenzekani,” kusho uNgwenya.
NgoJuni 11, iSilo sitshele amakhosi emhlanganweni obusoLundi ukuthi sifuna umhlangano noRamaphosa.
“Ngifuna ukukhuluma nomengameli ngokushesha ukuze angicacisele ukuthi kungani uma kukhulunywa ngomhlaba kuphunywe iqhubu nalo mhlaba wethu, onothile? Siyasukelwa, kukhona abasitshela ukuthi umhlaba wethu kufanele uthathwe, bawasebenzisa kabi amandla abanikwe wona,” kusho iSilo. Sithe iziphakamiso zikaMotlenthe zihlasela isizwe samaZulu. Isilo sesike sacela umhlangano noMotlanthe, eThekwini kodwa awuzange ubekhona.
“Umhlangano awuzange ubekhona ngoba uMotlanthe wathi umbiko wakhe usewudlulisele ePhalamende futhi nesigungu sakhe sesihlakaziwe,” kusho uNgwenya.