Kushintsha izikhulumi emcimbini weSolezwe
SEKUNEZINGUQUKO ngendumezulu yomcimbi wabesifazane ohlelwe yiSolezwe njengoba sekunesikhulumi esisha ebesingekho ohlelweni.
UDkt Stella Khumalo, oyisikhulu esiphezulu saseShaka Marine World eThekwini, usezoba yisikhulumi esiqavile kulo mcimbi ozoba se-Olive Convention Centre eThekwini. Ukushintsha kwezinhlelo kudalwe ukuthi uDkt Judy Dlamini, okunguye obezoba yisikhulumi kulo mcimbi obizwa ngeNtandokazi, usehoxile.
UNksz Zama Majola ophethe ezokukhangisa kwiSolezwe uthe uDkt Dlamini uthathwe isimo esiphuthumayo esiphoqe ukuthi ahoxe.
Uthe konke okunye okuhlelelwe abesifazane abazokwethamela lo mcimbi kusazoqhubeka. UNksz Majola ugcizelele ukuthi amathikithi omcimbi asephelile njengoba ayeshilo ukuthi likhulu isasasa.
“Sinxusa ukuthi abazohambela lo mcimbi basheshe bafike ukuze bathathe izithombe lapho sizobe sibahlelele khona mahhala. Sizobe sinosomabhizinisi abazobe bedayisa ngezingubo, amaduku, izikhwama nobucwebe,” kusho uNksz Majola.
Osomabhizinisi abazoba kulo mcimbi bazophinde bazazise, basho nohlobo lwamabhizinisi abalwenzayo. Ngalokhu, uNksz Majola, uthe bahlose ukuthuthukisa abesifazane kwezamabhizinisi.
Kunxuswa ukuthi abesifazane bangakhohlwa ukuthi kumele bagqoke izimpahla ezimnyama namaduku, okuhambisana nokuhlonipha uNkk Winnie Madikizela-Mandela ongasekho. Kuzokhuzwa nesihlava sokubulawa kwabesifazane, okuhambisana nomkhankaso waleli phephandaba i#sekwanele.
UDudu Khoza, ongumsakazi woKhozi FM, uzobe ephethe uhlelo bese kuthi umculi wowokholo, uHlengiwe Mhlaba, anandise ngomculo. Kuzobe kukhona noNksz Siwe Hlophe, ongumpheki wakwaSpekko, ozonikeza abesifazane amathiphu okushaya ibhodwe. Umcimbi uqala ngo-10 ekuseni.