Umndeni wethembisa ukubopha abakwasidlodlo
FUNA ukubopha amaphoyisa umndeni kagogo wengane eyatholwa ibulewe obethweswe amacala okubulala umzukulu kodwa agcina ngokuwahoxisa.
Umndeni wakwaMdletshe, oseNkundusi eMtubatuba, utshele Isolezwe ukuthi uhlazekile njengoba sekuboshwe amalungu amabili omndeni wabo ngokushona kwengane eneminyaka emithathu, uGamelihle “Gamo” Mdletshe.
Isidumbu sakhe satholakala emva kwezinsuku ezintathu edukile sintanta emfuleni, sicwiyiwe ngoDisemba ngonyaka odlule.
NgoJanuwari 13 kube sekuboshwa, uMnuz Khehla Mdletshe, ongumkhulu omncane kamufi. Wadedelwa ngoJanuwari 15 ngaphandle kokubekwa amacala ngokusemthethweni ngoba kuthiwa abukho ubufakazi bokuthi uyathinteka ecaleni.
NgoMashi amaphoyisa aphinde agasela kaMdletshe abopha ugogo wengane, uNksz Ntombibomvu Mdletshe (62). NgoLwesibili oledlule amacala ahoxisiwe ngoba kuthiwa abukho ubufakazi.
Lokhu kuboshwa kwezihlobo, Isolezwe lithole ukuthi, sekuxove umndeni njengoba bengasangenelani.
UMnuz Bongamandla Mdletshe, ongumkhulu wengane, uthe kubahlukumezile kakhulu ukuboshwa kukamfowabo nenkosikazi yakhe.
“Unkosikazi wami usemdala kakhulu ukuba igama lakhe lingadicilelwa phansi ngale ndlela. Amaphoyisa awakaze afike ekhaya exoxe nathi ngalolu daba. Sizokhuluma nommeli ophethe udaba ngoba sifuna amaphoyisa aboshwe ngakwenzile, esiphoxa,” kusho uMdletshe. Kwenzeka lokhu nje umfowabo, uKhehla, abasangenelani naye njengoba emva komngcwabo waboshwa, esephuma ejele wafuna incwadi yokuvimbela uBongamandla nezingane zakhe ukuba zingasondeli kuyena emva kokuba ezizwe engaphephile.
Kuthintwa uKhehla uqinisekisile lokhu. “Ngavulelwa icala ngaboshwa ngithinteka ekushoneni komzukulu, ngithe sengibuya esitokisini ngabizelwa emhlanganweni wokuya emhlahlweni womndeni nokwaba nzima ukuba ngibe yingxenye yawo ngenxa yesimo. Ngize ngafuna incwadi yokuba bengasondeli kumina. Ukuboshwa komsolwa nokuphothulwa kwecala yikhona okuyoqeda izinkulumo. Siwumndeni asisazwani ngenxa yalo leli cala,” kusho uKhehla.
Indodana kaKhehla, uMnuz Nkanyiso Mdletshe, (esesithombeni) ezifikele emahhovisi eSolezwe ikhala ngalesi simo sasemndenini njengoba uyise ehliswa isithunzi.
“Ubaba kuthiwa wadayisa ngegazi lakhe. Lezi zinkulumo zibhalwa abozalo koFacebook. Konke lokhu kusuka ekuboshweni kwakhe waphinde wadedelwa amaphoyisa. Kumanje umndeni awungenelani,” kusho uNkanyiso.
UBongamandla ebuzwa ngalokhu kuthukwa kukamfowabo ezinkundleni zokuxhumana uthe: “Angiwazi noFacebook ukuthi uyinto enjani, eyenziwa kephi.”
Amaphoyisa athe kusaphenywa ngokushona komufi.