‘I-ANC ayiziphathele yona iKZN’
UMHLAZIYI wezepolitiki ozimele, uMnuz Thabani Khumalo, uthi ubuholi be-ANC kuzwelonke kumele bungenelele, buziphathele isifundazwe saKwaZulu-Natal ukuze kuphele umdonsiswano okhona obeka ikusasa leqembu engcupheni.
Engxoxweni neSolezwe izolo, uKhumalo uthe zimbili izinto ezingaqeda umdonsiswano okhona eKZN. Ukuthi ubuholi bukazwelonke buziphathele noma bujube umakadebona weqembu othembekile futhi ongekho ezinhlangothini ukuthi kube nguyena oshanelayo.
“I-ANC eKZN isiphenduke inhlekisa ngezinto eziqhubeka kuyona ezidalwa ukuthi abukho ubuholi,” kusho uKhumalo.
Uthe inkinga ye-ANC eKZN izinhlangothi,
“Ngendlela okujule ngayo ukungaboni ngasolinye ngisho nokusebenzisana lokhu okuzanywayo ngeke kuze kulunge ngoba uhlangothi oluthile lungadonsa lubheke lena nolunye lwenze okufanayo,” kusho uKhumalo.
Omunye umhlaziyi wezepolitiki, uMnuz Xolani Dube, onguMcwaningi kwisikhungo iXubera Institute, uthe
i-ANC eKZN isifana nento engekho.
“Kumele sivume ukuthi uKhongolose eKZN usufana nento engekho usuziphendukele inkampani eqasha abantu,” kusho uDube.
UDube uthe akacabangi ukuthi i-ANC esifundazweni inendaba nokhetho lwangonyaka ozayo.
“Kuyimanje amaqabane ayisana ezinkantolo ngenxa yokubanga amandla, angiboni olunye uhlangothi lungakhankasela olunye ukuthi lungene emandleni, ingakho ngithi abanandaba nokhetho,” kusho uDube.
Uthe iyodwa into ebangwayo, iphalishi.
Ingqungquthela yokukhetha ubuholi obusha esifundazweni imiswe ngumzuzu wokugcina ngamalungu enhlangano anganeme asezifundeni ezintathu iMoses Mabhida, Lower South Coast naseHarry Gwala.
Lawa malungu akhala ngokuthi ayancishwa ubulungu benhlangano nokuthi ashiywa ngaphandle ezinhlelweni zombutho emagatsheni.
Kungakapholi maseko kumiswe ingqungquthela yesifundazwe, kuleli sonto kube sekumiswa ingqungquthela yokukhetha ubuholi obusha baseMoses Mabhida.
Izingqungquthela eKZN zimiswa ngamalungu enhlangano ahambisana noMengameli uMnuz Cyril Ramaphosa.