Uzobhadla ejele obedlwengula ephindelela
UGWETSHWE iminyaka engu-40 ebhadla ejele owesilisa (38) obehlalise lubhojozi abesifazane eDundee, Mondlo, Vryheid ngaseKuvukeni.
USikhumbuzo Mathe unikwe lesi sigwebo yiMantshi yeNkantolo yaseMadadeni ngezenzo zakhe zokudlwengula abesifazane kusukela ngo-Okthoba ka-2014 kuya kuNovemba ka-2016.
Uphenyo lwamaphoyisa luveza ukuthi uMathe wayebamba amantombazane aneminyaka ephakathi kuka-14 no-16 ngesikhathi ehamba wodwa ntambama.
Wayewabamba, awadlwengule awasabise ngokuwashaya, athi uma eke amceba uzowabulala.
Ubedlwengula ezindaweni ezihlukene ezisenyakatho yeKwaZulu-Natal kanti amacala avulwe ophikweni olubhekelele udlame emndenini, ukuvikelwa kwabantwana nokudlwengula, eDundee, Vryheid naseLadysmith.
UColonel Thembeka Mbele wamaphoyisa KwaZulu-Natal, uthe amaphoyisa awenze kahle umsebenzi wokuphenya amacala kaMathe yingakho egcine egwetshwa iminyaka engu-60 ngokudlwengula.
UMathe ulahlwe ngamacala amahlanu okudlwengula.
IMantshi imgwebe iminyaka ewu-10 ebhadla ejele ngamacala amane nengu-20 ngecala lesihlanu.
Iminyaka engu-10 uzoyidonsa kanye kanye bese ewu-20 eyidonsa eceleni. Lokhu kusho ukuthi uzodonsa iminyaka engu-40.
UMbele uthe ukugwetshwa kukaMathe kufanele kube wumyalezo ezigebengwini ukuthi umthetho uyasebenza futhi amaphoyisa azokwenza konke okusemandleni ukuvikela abantu baseNingizimu Afrika