Abantu baqwashiswe ngokufohla kwaseLiberty
ABANTU kumele baqinisekise ukuthi baba namakhophi emininingwane yemali abayitshale ezinkampanini ezithile ukuze kuthi uma kwebiwa imininingwane yabo kulezo zinkampani bangalahlekelwa yimali abayisebenze kanzima, kusho isazi somnotho nomthetho, uSolwazi Bonke Dumisa.
UDumisa ukhulume kanje emuva kokuthi inkampani yezimali iLiberty ithumele imiyalezo kumakhasimende ayo iwazisa ukuthi kukhona abafohle ingcinaminininingwane yamakhompyutha abo. Izigebengu ezenze lo mhlola zisabisa ngokuthi zizoyidedela yonke imininingwane eyimfihlo yamakhasimende enkampani uma ingakhokhi imali engadalulwanga.
Izolo iziphathimandla zaseLiberty bezivalelene emhlanganweni okhethekile zicubungula udaba lokufohla ubuchwepheshe bayo.
Esitatimende abakwaLiberty bathe: “Kuyishwa ukuthi sinazise ukuthi kunabantu abafohle ingcinamininingwane yethu yobuchwepheshe. Bathathe imininingwane yethu basitshela nokuthi ubuchwepheshe bethu bunezinkinga ezithile. Bathe bafuna sibakhokhele. Sesiqale uphenyo ukuthola ukuthi kwenzekeni futhi sizokwazisa amakhasimende ethu ngesikutholayo. Senza konke okusemandleni ukulungisa isimo,”
UDumisa uthe okwenzeka eLiberty kufanele kube yisifundo kubantu ukuthi bangathembeli kakhulu kumakhompyutha kodwa bagcine izitatimende ezinemininingwane yabo yemali ukuze uma kwenzeka okuthile bazi ukuthi imininingwane yabo ibimi kanjani.
“Abantu kufanele bagcine imininingwane yemali yabo ebalulekile ukuze kuthi uma kwenzeka isimo esifuze esakwaLiberty bazi ukuthi baphephile. ULiberty kufanele ulungise izinto zawo zobuchwepheshe ngoba ayizwakali kahle le nto yokuthi imininingwane eyimfihlo yabantu isiphethwe ngabantu abangagunyaziwe ukuthi bayiphathe. Asazi ukuthi bazoyisebenziselani leyo mininingwane. Kufanele ilungiswe le nto,” kusho uDumisa.
Uthe kungenzeka kucelwe abantu ukuthi balethe imininingwane ethile kanti uma kuwukuthi abenzi amakhophi kusho ukuthi ngeke babe nayo. “Abantu kufanele bahlale beqaphile manje ngoba kuyacaca ukuthi izigebengu zikuyo yonke indawo, benze amakhophi emininingwane yabo, baxhumane nezinkampanini abalondoloze kuzo imali ukuqinisekisa ukuthi konke kuhamba kahle.”