I-DA ifuna kudedelwe umbiko kaMotlanthe

I-DA ibhalele uSomlomo wesiShayamthetho saKwaZuluNatal, uNkk Lydia Johnson, imcela ukuthi adedele umbiko kaMotlanthe we-Acceleration of Fundamental Change ophakamisa ukuthi kuhlakazwe Ingonyama Trust, ukugwema izinkulumo ezishayisanayo ngawo.

Ngesonto eledlule, iSilo sithe sifuna uMengameli Cyril Ramaphosa asichazele kabanzi ukuthi kungani uMotlanthe efuna ukuphuca abantu umhlaba sathi nabameli baso bazoluyisa enkantolo lolu daba.

UMnuz Francois Rogers, ongumholi weDA esiShayamthetho saKwaZuluNatal, uthe kubalulekile ukuthi uNkk Johnson awudedele umbiko ukuze kube nenkulumo mpikiswano.

“USomlomo wayalelwa ukuthi asinike umbiko kaMotlanthe ukuze siwufunde bese sikhuluma ngawo. Kuze kube manje akakakwenzi lokho yize wethulwa ngoNovemba wonyaka odlule. Kubalulekile ukuthi siwudingide kabanzi ngoba kunezinkulumo ezishayisanayo ngawo kwi-ANC,” kusho uRogers.

Uthe ukungadingidwa kwalolu daba kwenza ukuthi kwande imibiko eshayisanayo ngeNgonyama Trust neqhaza layo.

“Ezingxoxweni zethu neSilo namakhosi sithole ukuthi sizibophezele ekuthuthukiseni impilo yabantu basemakhaya ngakho asithandi ukuthi kube nento ezobaphazamisa. Siyaqhubeka nokuxoxa namakhosi nabantu abahlala ezindaweni zasemakhaya ukuqinisekisa ukuthi bavikelekile futhi bayakwazi ukusebenzisa umhlaba wabo ukuze bahlomule ngamathuba ezomnotho,” kusho uRogers.

UMnuz Wonder Hlongwa, obhekele ezokuXhumana esiShayamthetho uthe ihhovisi likaSomlomo liyitholile incwadi yeDA futhi udaba oluphakanyiswe kuyo luzosukunyelwa.