Sebetheleke ngezinkani osayidinsi eKZN
KUPHUME osayidinsi abanela amakesi angu-500 emabhishi aseNingizimu yeKwaZulu-Natal njengoba sebeqalile ukufuduka kwezinye izifundazwe beza kulesi.
Izolo uMnuz Mike AndersonReade weKZN Sharks Board, uthe osayidinsi sebetheleke ngezinkani KwaZulu-Natal futhi amanethi akhishwa abadobi agcwele phama.
“Osayidinsi abaningi kanjena sagcina ukuba nabo ngo-2010, kule minyaka edlule bebeyingcosana. Siwasusile amanethi emabhishi amaningi esingabala kuwo iHibberdene, Mthwalume, Kelso, Ifafa namanye ngenxa yokuthi osayidinsi kufanele bahambe ngokukhululeka,” kusho yena.
Uthe osayidinsi balandelwa yizilwane ezinkulu okufanele nazo zingabhajwa emanethini abale kuzo amahlengethwa, izinyoni ezidla osayidinsi noshaka.
Uphethe ngokucela abantu ukuthi balandele imiyalelo yezokuphepha abazonikwa yona ngabagade ababhukudayo emabhishi ukuze baphephe.
“Siyaqonda ukuthi ngesikhathi sosayidinsi abantu abathanda ukubhukuda emabhishi bayakhathazeka ngenxa yokuthi amanethi asuke ekhishiwe kodwa kubalulekile ukuthi siwasuse amanethi ukuze ofishi nezinye izilwanyana zasolwandle zingabhajwa emanethini. Siyacela umphakathi ubekezele ngoba nawo sifuna uphephe yingakho siwazisa uma sesisuse amanethi,” kusho u-Anderson-Reade.
Uthe bazosiqapha ngeso lokhozi isimo emabhishi ngoba abadobi sebehlala khona ukuze babambe osayidinsi.
“Sizotshela omasipala abahlukene ukuthi yimaphi amabhishi esesiwakhiphe amanethi ukuze benze izinhlelo zokuphephisa umphakathi,” kusho u-Anderson-Reade.