Bajabule ongqongqoshe ngabakhi bamakhondomu
UNGQONGQOSHE wezeMpilo kuleli, uDkt Aaron Motsoaledi noNgqongqoshe walo mnyango KwaZulu-Natal, uDkt Sibongiseni Dhlomo, banelisekile ngokusebenza kwenkampani ekhiqiza amakhondomu, eseDube Trade Port.
Ngemuva kokuvalwa kwengqungquthela ebidingida izinto ezithinta isifo sofuba, eThekwini, ngesonto eledlule uDhlomo noMotsoaledi bavakashele isikhungo esakhiwe ngokusebenzisana nenkampani yase-United States, iHBM neSA Potection Services. Lesi sikhungo sibizwa ngokuthi iHBM-SA.
Lesi sikhungo sikhiqiza amakhondomu angu-700 000 ngosuku. Lawa makhondomu aphakelwa ezikhungweni zezempilo zakuleli, amanye adayiswe emazweni angaphandle. Kulindeleke ukuthi le nkampani yenyuse isibalo somkhiqizo wayo kungekudala njengoba iqhubeka nokunweba ibhilidi esebenzela kulo.
Amakhondomu akhiqizwa kulesi sikhungo, iMax Condoms, angene esikhundleni seChoice azosatshalaliswa ezikhungweni zikahulumeni.
Le nkampani, eyakhiwe ngoR150 million, iqashe abantu abangu-150 bendawo. Ngaphambi kokuthi kusungulwe le nkampani, uMnyango wezeMpilo bewuwathenga eChina amakhondomu asatshalaliswa ezikhungweni zikahulumeni. Ngemuva kokuthi uhulumeni esungule uphiko oluyisipesheli lokuthuthukiswa komnotho, eDube Trade Port, uthathe isinqumo sokuthi le nkampani ibe kulesi sikhungo esenzelwe ukuthi kube lula ukuthi kuthunyelwe izimpahla kwamanye amazwe.
UDkt Dhlomo uthe: “Ungqongqoshe kumjabulisile akubone kulesi sikhungo waze wethembisa ukuthi uzobuya maduze azosivula ngokusemthethweni. Okumjabulise kakhulu ukuthi lesi sikhungo singakwazi ukukhiqiza amakhondomu angu-1.4 million ngosuku. Thina kulesi sifundazwe sishaye izinyoni ezimbili ngetshe elilodwa ngokuvulwa kwalesi sikhungo esifundazweni sethu, ukuba khona kwaso kusho ukuthi ngeke sishodelwe ngamakhondomu njengoba ezobe ekhiqizwa lapha. Kuzoba lula ukuthi athunyelwe ezikhungweni zezempilo kulesi sifundazwe,” usho kanje.
Amakhondomu athathwa njengesivikeli esiphephile esingavikela ukukhulelwa okungadingekile nokudluliselana ngezifo socansi.
Izibalo zezempilo kuleli zikhombisa ukuthi amantombazane aneminyaka ephakathi kuka-15 no-24 kunamathuba amaningi okuthi athole igciwane lengculazi nokuthi akhulelwe engahlelile. Lokhu kunomthelelela wokuthi kube nabafundi abaningi abaphume esikoleni bengaziphothulile izifundo zabo ezikoleni zamabanga aphezulu nasezikhungweni zezemfundo eziphakeme.
UDhlomo uthe uhulumeli usaqhubeka nokugqugquzela ukuthi abantu basebenzise uhlelo lokuzivikela oluhlanganisa izindlela ezembili ngesikhathi esisodwa, iDual Protection. Abesilisa basokwe kodwa baqhubeke basebenzise amakhondomu, njalo uma beya ocasini, abesifazane basebenzise amaphilisi noma umjovo wokuhlela nekhondomu, njalo uma beya ocansini.