UKhuzwayo uthembisa lukhulu
UPATSON “Sparks” Banda oke waba ngunozinti we-Orlando Pirates eminyakeni eyedlule, uthi iqembu selimtholile unozinti ozokwakha uzinzo ngemuva kweminyaka lidonsa kanzima.
Selokhu kwadlula emhlabeni uSenzo “Nzori” Meyiwa ngo-2014 iBucs idonsa kanzima emapalini.
Phakathi konozinti asebeke bazama ukuvala indawo kaMeyiwa kukhona uFelipe Ovono, wase-Equatorial Guinea, ofike eqenjini waboza kwabona ngisho ingane incane. UBrighton Mhlongo uzamile kodwa wagcina eshiyile njengoba esekhonjwa kwiBidvest Wits. UWayne Sandilands uqale kahle kodwa waphendulwa impuphu igoli likaHlompho Kekana alishaya emaphakathi nenkundla maphakathi nesizini edlule, noSiyabonga Mpontshane osayibambile yize naye kusekhona amaphutha. Omunye unozinti obesemapalini ngesizini edlule nguJackson Mabokgwane.
NgokukaBanda ukusayina uBrilliant Khuzwayo obekhuhla ibhentshi kwiKaizer Chiefs, kuzoletha uzinzo emapalini eBucs ngoba ungunozinti osezingeni eliphezulu.
“Ukukhuluma iqiniso nje iPirates ibishoda ngonozinti osezingeni likaKhuzwayo sonke lesi sikhathi (esho selokhu kwadlula emhlabeni uMeyiwa). Leli yithuba lokuthi uKhuzwayo azibonakalise kwazise ubelizwa ngendaba ijezi ku-Itumeleng Khune. Akuzoba lula nokho ngoba kuzofanele alijulukele. Ngibona uMpontshane ezomthwalisa kanzima. Okungijabulisayo ngokusayina uKhuzwayo wukuthi uzoletha uzinzo eqenjini uma engeke akhuhliswe ibhentshi. Kubalulekile ukuthi adlaliswe ngoba ngokwami ungunozinti osezingeni eliphezulu uma ngiqhathanisa nabakhona kwiPirates njengamanje,” kusho uBanda. Ngesikhathi ethulwa kweziMnyama uKhuzwayo uthe ufuna ukuqhubeka lapho kwakugcine khona uMeyiwa. “Ngijabule kakhulu ukuthi ngizodlalela iPirates eyayigijinyelwa nguMeyiwa. Ngizizwa ngibusisekile ukuthi ngizongena esikhundleni sakhe ngoba sobabili sisuka eMlaza. Ngifuna ukuqhubeka lapho ayegcine khona futhi nginethemba lokuthi sizobajabulisa abalandeli. Akusavumi ngilinde njengoba sengijahe ukuba senkundleni ngibambe ibhola. Sengizibona ngibheka ukuthi ubani osesikhaleni ngimuphasele. Sengijahe ukubona abalandeli enkundleni emdlalweni wethu wokuqala,” kusho uKhuzwayo kwi-website yePirates.
Izolo iPirates imemezele ukuthi ichitha isitobha, uMarc Van Heerden. Ngokusho kwesitatimende
seBucs, ukugqabuka kwegoda kube ngokuhle njengoba bevumelene ngesihle noVan Heerden. Ubesehlale izinyanga eziwu-18 eqenjini wadlala imidlalo ewu-21.
“Ngokwami lokhu kuveza ngokusobala ukuthi iPirates kukhona isitobha esidlala ngonyawo lwesinxele esivele isivumelene naso ukuba sithathe indawo kaVan Heerden. Kungekudala bazosethula abaphathi bePirates.”