Isikhulu simfuna ekhaya uMzimela
GINGAKUJABULELA ukuthi sijoyinwe nguMzimela ngoba ungumfana wasendaweni, ngakho uzoqinisekisa ukuthi into yakubo uyayigada.” Lawa ngamazwi esikhulu seRichards Bay FC, uSifiso “Jomo” Biyela, otshele leli phephandaba ukuthi unesifiso sokuthi uMbongeni “Kati” Mzimela, ongunozinti wePlatinum Stars, ajoyine ezakhe ngesizini ezayo.
Lesi sikhulu sitshele Isolezwe ukuthi asifuni nakancane ukuthi iRichards Bay FC edlala kwiNational First Division (NFD) eyakheka ngemva kokudayiswa kweThanda Royal Zulu, izithole isesimweni esifana nangesizini edlule lapho ivike khona izembe sekuvalwe amehlo ngomdlalo wokugcina, ishaya iMbombela United ngo-1-0.
UBiyela uthi kungakho kule sizini ezoqala ka-2018/19 enesifiso sokuthi ezakhe ziqede kuTop 8, bese kuthi ngesizini ezolandela athole indawo emidlalweni yokuhlungela ukukhuphukela kwiPremiership. Konke lokhu uthi kuncike ekutheni abadlali abafana noMzimela babuyele ekhaya ukuze bezosiza abadlali abancane ngesipiliyoni.
“Ngiyafisa uKati (esho uMzimela) abuyele ekhaya. Into enhle ngokuthola umdlali ofana naye ukuthi ungowokuzalwa lapha eMpangeni, okuyilapho iRichards Bay FC ingeyakhona. Lokho kusho ukuthi uzoyigada into yakubo. Okunye isipiliyoni anaso singasisiza kakhulu eqenjini njengoba sinabadlali abasebancane kakhulu. UMzimela uyayazi into okufanele ayenze, unayo inombolo yami yocingo, ngingakujabulela ukuthi angishayele,” kusho uBiyela.
Ukhuluma kanjena nje uBiyela, uMzimela usanda kugawulwa yizembe neDikwena njengoba behluleke ngisho sebethola ithuba lesibili lokubuyela ku-Absa Premiership kweyokuhlunga ewinwe iBlack Leopards.
Okuqaphelekile ukuthi ngesikhathi iDikwena idlala kweyokuhlunga uMzimela wayengekho ezintini kuleli qembu njengoba kwavimba uDino Visser. Imibiko ehoshwe Isolezwe ngeyokuthi uMzimela ulidubile leli qembu eselifudukele eKapa ngezizathu ezingakacaci.
“Ngesizini edlule, enye yezinkinga esibhekane nayo ukuthi saqala isizini abadlali singenabo kahle. Lokhu kwenza uzinzo lwangaba khona eqenjini. Kulokhu sifuna ukusheshe siqede ukusayina abadlali ukuze kuzoba nozinzo, sikwazi ukuqala ukulungiselela isizini entsha kusenesikhathi,” kusho uBiyela.