Ufisa bakhule ndawonye owe-Under 20
UNESIFISO sokuba bakhule ndawonye njengabadlali ba-Under 20 wamaBhokobhoko, uWandisile Simelane, oyiphini likakaputeni kuleli qembu eliphume isithathu emqhudelwaneni weWorld Rugby U/20 Championship, obuseFrance.
Ngokusho kukaSimelane ubona ikusasa liqhakazile kubadlali abebeyingxenye yaleli qembu, nathi akufanele neze bahlukane kuze kube bafika kumaBhokobhoko acijwa uRassie Erasmus eminyakeni ezayo. Leli qembu, elicijwa uChean Roux, lehlule iNew Zealand ngo-40-30 ngesikhathi bebanga indawo yesithathu kulo mqhudelwano osongwe ngempelasonto.
Emdlalweni we-semi final, ezikaRoux zishaywe kabuhlungu i-England ngo-31-30.
“Sijabule ngokuphuma isithathu kulo mqhudelwano. Ngaphandle nje kokudlala ndawonye, kuningi esikufundile singabadlali kulezi zinyanga ezintathu esizihlale ndawonye. Sifunde ukwazana kangcono ngaphandle kwenkundla, nokunye okuningi okuthinta amasiko ethu ngamunye. Isifiso sami ukuthi sikhule ndawonye size sifike kumaBhokobhoko amakhulu. Ngifuna ngelinye ilanga sixoxe ngazo zonke izehlakalo ezisehlele siseFrance ngoba ziyasikhuthaza kakhulu,” kusho uSimelane.
IFrance, okuyiyona ebisingethe lo mqhudelwano, iyona ebe ngompetha ngemva kokushaya
i-England ngo-33-25 ngeSonto kusihlwa. Amanye amaqembu abeyingxenye yalo mqhudelwano i-Australia, Argentina, Wales, Italy, Georgia, Scotland, Ireland neJapan. U-Under 20 wamaBhokobhoko uzotheleka kuleli namuhla.
Khonamanjalo, amaBhokobhoko amadala anyukele endaweni yesithathu ekuklelisweni emhlabeni ngemva kokunqoba e-England ngempelasonto emdlalweni we-Castle Lager Incoming Series. Elakuleli belikade liyibambe endaweni yesikhombisa ngaphambi kokuthi kuqale lolu chungechunge lwemidlalo emithathu. Amabhokobhoko aqeqeshwa uRassie Erasmus awunqobile nomdlalo wokuqala asehamba phambili ngo 2-0. La maqembu asezohlangana emdlalweni wokugcina eKapa ngempelasonto.