IJaguars isivikele isicoco sayo kwiNetball

IGAUTENG Jaguars, okuyiqembu elidlala i-netball laseGoli, lisivikelile isicoco salo seBrutal Fruit Netball Premier League (BFNPL). IJaguars ithele othulini iSouthern Stings ngo-49-47 kowamanqamu obuseRembrandt Hall, ePitoli ngempelasonto.

Leli qembu likhale lemuka nesamba semali engu-R100 000, kwathi iStings, esilale isibili, sathola umthoba nhliziyo wemali engu-R40 000.

Emdlalweni womthobanhliziyo wendawo yesithathu, iNorth West Flames inqobe ngo-66-64 ibhekene neFree State Crinums enkundleni efanayo.

Kubadlali abavelele, uKhanyisa Chawane weCrinums, uyena obe iPlayer of the Tournament kwathi u-Iner-Mari Venter weJaguars wathola umklomelo weShooter of the Tournament. UShadine van der Merwe ukhale wemuka neDefender of the Tournament, yena uyibamba kwiJaguars.

Umqeqeshi weJaguars, uJenny van Dyk, ucashunwe esitatimendeni esithunyelwe ethi, “Kuthathe isikhathi ukuthi sikwazi ukuhlangana ngendlela kodwa ekugcineni izinguquko esizenzile zisisebenzele.”

Uthe ikhefu limnikeze isikhathi sokuthi akwazi ukucabanga ngokumele akwenze ukuvimba iStings.

“Sesidlale kahlanu kweyamanqamu, sawina kabili. Kulokhu asikaze sihlulwe, okusho ukuthi sesiqhube imidlalo engu-18 singashaywa. Lokhu kukhombisa ukuthi iqembu liyakhula futhi liyawubamba umgqigqo,” kusho uVan Dyk.

Iqembu laKwaZulu-Natal, iKingdom Stars elihlulwe kumaquarterfinal, ligcine lithole indawo yesithupha kulo mqhudelwano wamaqembu angu-10. Kulindeleke ukuthi umqeqeshi weStars, uMadri Maritz ashiye njengoba ubesehlale iminyaka emibili iqembu lingenzi kahle. Leli phephanda like labika ukuthi ubesevele evalelisile kubadlali yize umqhudelwano ubungakapheli.

Emsileni kuvale iNorthern Cape Diamonds engelinye lamaqembu ahlezi edonsa ngodizili.