UCaster usethembele enkantolo ‘ecwaswa’
ISIHLABANI somgijimi wakuleli, uCaster Semenya, siyiphonsele inselelo inhlangano eyengamele ezokugijima emhlabeni jikelele
i-International Association of Athletics Federation (IAAF) ngokuyifaka enkantolo.
Le nhlangano iphakamise ukuthi kufanele kube nemithetho nemigomo ezolandelwa abasifazane abane-testosterone ephezulu emizimbeni yabo. USemenya ngomunye wabagijimi okwatholakala ukuthi umzimba akhe ukhiqia lesi sikhuthazi semvelo ngokungaphezulu kwesikalo esijwayelekile kwabesifazane.
Lokhu kusho ukuthi kuzoba nemibandela uSemenya okuzofanele ayilandele ezomlawula, nokungenza aphazamiseke ngokomqondo nangokomzimba emiqhudelwaneni emikhulu. I-IAAF ikhiphe umthemtho othi kumele laba bagijimi badle amaphilisi okudambisa i-testosterone noma bangazihlanganisi nokugijima ibanga lika-400m, 800m no-1500m. La mabanga yiwona kanye uSemenya agila kuwona izimanga.
Ngokusho kukaSemenya osewole izindondo zegolide kumaOlympic, World Championship nakumaCommowealth Games, lokhu okushiwo yile nhlangano kuyacwasa futhi akwamukelekile. Ngokombiko wephephandaba lase-USA, iNew York Times, uSemenya ufake icala kwiCourt of Arbitration for Sport (CAS) eLausanne, eSwitzerland ngenhloso yokuvimba lo mthetho we-IAAF osuse okukhulu ukukhuluma.
Lo mthetho kulindeleke ukuthi uqale ukusebenza ngoNovemba.
“Empeleni angithandi ukukhuluma ngalo mthetho, kepha kuyangiphoqa ukuba ngikhulume ngawo. Ngifisa ukugijima njengokwejwayelekile ngaphandle kwezinkulumo ngoba ngazalwa nginjena. Angibuboni ubulungiswa uma ngizotshelwa ukuthi angishintshe indlela engiyiyona. Akumnandi ukuthi ngihleze njalo ngisolwa ngobulili bami. Engifuna kwaziwe ukuthi nginguMokgadi Caster Semenya, ngingowesifazane futhi ngiyagijima,” kuchaza le ntokazi ebikhuluma okokuqala selokhu lo mthetho wamenyezelwa ngoEphreli.
Ngokusho kwe-IAAF, abagijimi besifazane bavamise ukuba ne-testosterone engu-0.12 kuya ku-1.79 wama-nanomoles ilitha, kuthi abesilisa babe nengu-7.7 kuya ku-29.4 wama-nanomoles ilitha.
Ngesikhathi i-IAAF imemezela lo mthetho, yathi iyazi ukuthi uzosusa umsindo futhi ikulungele ukuziphendulela ngawo.
USemenya ubengakaze aphawule ngalolu daba njengoba eqhubeka eyibamba emiqhudelwaneni. Usenqobe kabili kwi-IAAF Diamond League kulo nyaka ku-800m naku-1500m. Kulindeleke ukuthi amele iNingizmu Afrika kwi-Athletics World Cup eseLondon ngoJulayi.