Akanavalo ngokudayiswa kweCeltic
KUMQINISA idolo umdlali weBloemfontein Celtic, uMenzi Masuku, ukuzwa abalandeli bethi iqembu ngeke lishabalale
njengoba kubanjwe umoya ngemva kokuthi isikhulu saleli qembu, uMax Tshabalala, siveze ukuthi sesilifake endalini.
Ngendlela isimo esesisibi ngakhona kwiCeltic, uTshabalala uthi usegadle zephuka, akasenayo imali yokuqhuba iqembu. Useke waba nomhlangano naneMeya yaseMangaung, u-Olly Mlamleli nabanye osomabhizinisi bendawo bezama izindlela zokuphuma kulesi simo. Ingozi enkulu ngalolu daba lweSiwelele ukuthi kunabanye osomabhizini abangesibona abakodabuka eBloemfontein abazimisele ngokulithenga leli qembu.
Uma lokhu kungenzeka kungasho ukuthi abalandeli baleli qembu bangasala bengenaqembu, kanti nabanye babadlali bengaphelelwa yitoho. UMasuku osalelwe iminyaka emibili kwinkontileka yakhe neCeltic uthi abathukile ngokwenzekayo.
“Thina singabadlali siyazi ukuthi iqembu ngeke lisuke eBlomfontein ngoba sihlanganile nabalandeli beqembu basitshela ukuthi asehlise umoya, iqembu ngeke liye ndawo. Lokhu kwenze saqina idolo ngoba abalandeli beCeltic abadlali kanjalo, bathi phinde ngeke leliya qembu lihambe laphaya. Sizwile futhi ukuthi sebekhona osomabhizinisi asebekhombisa ukuyithakasela eyokufaka izimali kwiSiwelele,” kusho uMasuku oke wagijima kwi-Orlando Pirates nakwiChippa United.
Ngeledlule kuvele ukuthi uVeselin Jelusic obecija iCeltic ushiye phansi kuleli qembu. Phakathi kokunye okuthiwa kushiyise uJelusic ukuthi linezinkinga zezimali.
“Kube buhlungu ukuzwa ukuthi useyasishiya ngoba bese simjwayele kakhulu. Ubesesiqonda njengabadlali sonke ukuthi kulaphi lapho senza khona kahle, nalapho sibuthaka khona. Nokho lezi izinto ezenzekayo ebholeni okufanele sizamukele,” kusho uMasuku ozabambisana no-Ayanda Gcaba obegijimela i-Orlando Pirates banikele ngezingubo nezicathulo esikoleni eNgezana Primary School, KwaMashu eThekwini maphakathi nesonto.