Sekubhekwe umqeqeshi ngoSalah
WONKE amehlo azobheka umqeqeshi we-Egypt, uHector Cuper ukuthi uzosibophela yini isilomo somdlali, uMohamed Salah, njengoba iqembu lakhe linomdlalo omqoka neRussia kwiNdebe yoMhlaba.
IRussia engosokhaya iza kulo mdlalo onamuhla eSaint Petersburg ngo-8 ebusuku ihambela phezulu ngemuva kokuvula uGroup A ngokulobola iSaudi Arabia ngo 5-0.
I-Egypt ishaywe yi-Uruguay ngo 1-0 ngemizuzu yokugcina emdlalweni uSalah awubuke ebhentshini waze wayophela.
UCuper kungenzeka ukuthi akazange ambophele uSalah ngenxa yokubona ezakhe zibambelele ku 0-0 kanti i-Uruguay izogadla ngomzuzu ka-90.
USalah ufike kule midlalo kubanjwe umoya kulandela ukulimala egxalabeni ezakhe, iLiverpool, zitholene neReal Madrid kowamanqamu we-Uefa Champions League. Akazange asiqede nesiwombe sokuqala salowo mdlalo wangenyanga edlule ephuma ekhala enkundleni edlaliswe kabi uSergio Ramos weMadrid neSpain.
Ngokusho kuka-Ihab Leheta oyimenenja ye-Egypt obekhuluma nabe-Fifa.com, uSalah usengumqemane.
“USalah uziqeqeshile nozakwabo waze waqeda. Ukulungele ukudlala neRussia ngokusho kwethimba labaqeqeshi.”
Uma iRussia inqoba izobe izibeka ethubeni elihle lokudlulela esigabeni seLast 16.
Le lizwe elize emqhudelwaneni lifa yinduku emidlalweni yobungani, lisemizameni yokungangeni emlandweni omubi wokuba yiqembu lesibili elingosokhaya ukuphuma kweyamaqoqo. INingizimu Afrika iyona enaleli rekhodi elibi ngemuva kokuhluleka wukungena kwiLast 16 kudlalelwa kuleli ngo-2010.