Awenduduzo ngelungu le-ANC
IBINGENA ilekanyana imiyalezo yenduduzo emuva kokudutshulwa kwelungu lePhalamende le-ANC, uMnuz Sibusiso Radebe, oshone ngesikhathi izigebengu zizama ukumduna imoto eRoodeport, eGauteng.
Lesi sigameko esishiye amalungu ePhalamende eshaqekile senzeke ngoLwesibili ebusuku.
Udutshulwe ekhanda nasemlenzeni ngemuva kokuba abasolwa bemfune iselula. Kuthiwa ubehleli nomunye umuntu emotweni ebipake emgwaqweni uCarbon ngesikhathi behlaselwa abasolwa ababili.
UNkk Cheryllyn Dudley oyilungu le-ACDP ePhalamende ucele amaphoyisa ukuthi enze konke okusemandleni ukuthola ababulali ngoba kuyabethusa ukubulawa kosopolitiki ikakhulukazi njengoba kulungiselelwa ukhetho lwangonyaka ozayo. USotswebhu weDA, uMnuz John Steenhuisen, uthe uRadebe ubeyindoda ethanda umndeni wayo, isebenza kanzima ukuthuthukisa impilo yabantu baseNingizimu Afrika.
URadebe wazalelwa eLukwatini, eMpumalanga. Ufike ePhalamende ngo-2009 wasebenza emakomitini ahlukene washona esesekomitini lezokuthutha.
USihlalo wekomiti lezokuthutha ePhalamende, uNkk Dikelezi Magadzi, uthe uRadebe ubenesibindi ewenza ngokuzimisela umsebenzi wakhe. “Ubengumuntu omusha onamandla ebesimbona enekusasa eliqhakazile. Silahlekelwe siyikomiti lezokuthutha. Sizokhumbula indlela abebuza ngayo imibuzo, isitayela sakhe namancoko,” kusho uNkk Magadzi.
UMnuz Narend Singh we-IFP uthe uRadebe ubengumuntu omusha osebenzela umphakathi obeyishukumisa inkundla uma sekuthintwa izindaba zekomiti.
“Sicela amaphoyisa angalali, asivikele singabantu baseNingizimu Afrika ngoba ubugebengu buyinkinga. Kubuhlungu ukulahlekelwa ngabantu abancane, kuba buhlungu kakhulu uma besishiya ngenxa yokudutshulwa yizigebengu,” kusho uSingh.
USomlomo wePhalamende uNksz Baleka Mbete noSihlalo womkhandlu wezifundazwe, uNksz Thandi Modise, badlulise amazwi enduduzo emndenini kaRadebe. Bathe abezomthetho kumele baphenyisise ukuze kubanjwe izigebengu.