ICosatu ixwayisa ngoweMinimum wage
ICOSATU isixwayise ngokuthi ukubambezeleka ukuphasisa umthethosivivinywa weholo eliphilisayo iNational Minimum Wage kuzoshaya ephaketheni abasebenzi.
Lesi sexwayiso sikhishwe emkhandlwini wezifundazwe izolo njengoba bekunomhlangano wekomiti elibheka ukuthuthukiswa komnotho namabhizinisi. Umthethosivivinywa bekumele uqale ngoMeyi kodwa kwahlehliswa kuze kuphothulwe uhlelo lwasePhalamende.
UMnuz Matthew Parks weCosatu uthe unethemba lokuthi umkhandlu wezifundazwe uzolusheshisa lolu daba ngo-Agasti ukuze uMengameli Cyril Ramaphosa awusayine kube ngumthetho ungakapheli unyaka.
USihlalo waleli komiti uMnuz Mandla Rayi uthe ngeke bavumele ukuthi kube nokunye ukubambezeleka.
“ICosatu isikhalazile ifuna ukuthi umthethosivivinywa uphasiswe ngokushesha,” kusho uRayi.
UMnuz Eddie Makue we- ANC uthe ngeke bakumele ukubambezeleka.
“Uhlelo lwezomthetho oselubambezelekile. Akumele kube nokunye ukubambezeleka siyahambisana nalokho,” kusho uMakue.
UParks uthe bayixoxile ePhalamende ezinyangeni ezimbalwa ezedlule ukuthi lungasheshiswa uhlelo ngoba kunezinkinga nomthethosivivinywa.
Kodwa abafuni ukuthi kube nokubambezeleka ngoba amalungu abuza ukuthi kanti umthethosivivinywa uqala nini.
“Sixoxe nePhalamende ukuthi lingasheshisi izinto ngoba kuzoba nenkinga yezinkantolo. Sihambise iziphakamiso ezingu-16 ukuze kube nezichibiyelo kodwa iPhalamende lamukela kuphela ezingu-13. Kuthiwa lo mthethosivivinywa uzokhipha iningi labantu ebubheni njengoba bengu-6.4 million abasebenzi abazohlomula.
UParks uthe iPhalamende nalo kumele ligxekwe ngokubambezeleka kwalo mthethosivivinywa ngoba wabekwa ezithebeni zalo ngoNovemba nyakenye, laze lawuphasisa ekupheleni kwenyanga edlule.
Isiphakamiso sithi umuntu ohola kancane kumele ahole uR3 500 ngenyanga.