OweCosatu ugxeke owokudalula iminikelo
ICOSATU isigxeke umthethosivivinywa wokudalula ukuthi amaqembu ezepolitiki axhaswa ngubani, yathi umbandela okhona okwamanje wenza angavezi konke.
Umxhumanisi weCosatu nePhalamende, uMnuz Matthew Parks, ubekhuluma kwikomiti lomkhandlu wezifundazwe izolo njengoba bekunezigcawu zokuletha ukuphawula ngalo mthethosivivinywa.
UParks uthe, “Imibandela ekhona okwamanje ithi asikho isidingo sokuthi udalule umuntu okuxhasayo uma imali ingaphansi kuka-R100 000. Iningi le mali ngoba sike sabona osopolitiki begwazelwa ngo-R100 000. Umuntu angahlakanipha anikele ngo-R99 000 njalo ukuze angadalulwa.”
Uqhubeke wathi, “Akukho ukuvuleleka ngale mibandela ekhona okwamanje. Kumele yonke iminikelo idalulwe. Noma kungathiwa u-1 cent,” kusho uParks. Okwamanje umthethosivivinywa uvumela ukuthi amaqembu adalule uma umnikelo ungaphezulu kuka-R100 000. Inhloso yomthethosivivinywa ngukuthi yonke into ibe sobala, bavezwe labo abanikelayo.
“Uma uthola i-bank statement ebhange, ayigcini kuphela ku-R100 000 kuya phezulu kodwa iveza yonke into. Kumele kususwe yonke imibandela kulo mthethosivivinywa ngoba noma ungayibeka ku-R50 00 kodwa kukhona abazohlakanipha banikele ngo-R49 000 eceleni.”
Uma ugcina ngokuphasiswa lo mthethosivivinywa kuzodingeka ukuthi ikhomishini eyengamele ukhetho kuleli yakhe isikhwama esizohlanganisa wonke amaqembu.
Enye yezinhlangano eyenze izethulo iMy Vote Counts.
Le nhlangano ifuna ukuthi izinhlangano ezisezingeni lohulumeni basekhaya bafakwe ngaphansi kwalesi sikhwama.
Umcwaningi wale nhlangano, uZahira Grimwood uthe, “Ngiyazi umthethosisekelo ubeka imibandela yokuthi kuxhaswe amaqembu kuzwelonke nasezifundazweni kodwa nakohulumeni basekhaya angiboni kungani kumele amaqembu angaxhaswa. Ohulumeni basekhaya ibona abasiza imiphakathi ngakho akumele ngabe bashiywa ngaphandle,” usho kanje.