Kuqeqeshwe abezikole ezingenzanga kahle
BAQEQESHIWE othishanhloko bezikole zaKwaZulu-Natal abashaya udaka kwa-matric nyakenye izikole zabo ezathola 0% kuya ku-10%.
UDkt Barney Mthembu, inhloko yezivivinyo eMnyangweni wezeMfundo esifundazweni, uthe babaqeqeshile labo thishanhloko ngoba bebengafuni ukuthi izikole zabo zenze kabi nakulo nyaka.
UMthembu uthe bakhathazekile ngokuthi kunezikole ezingenzi kahle. “Yingakho sababizela emhlanganweni sabaqeqesha ukuze izikole zabo zenze kahle. Ziningi izinto esithole ukuthi zenza izikole zingenzi kahle, kokunye uthola ukuthi isikole asinakho ukwesekwa abazali nokusenza singenzi kahle.”
Uthe baqeqeshwe ngamakhono okuphatha, indlela okumele baziphathe ngayo othishanhloko baphinda bagxila ohlelweni lokufunda nokufundisa bebheka ukuthi kufundiswani.
Umbiko womnyango othulwe esiShayamthetho sesifundazwe uveza ukuthi zingu-84 izikole ezithole ngaphansi kuka-30% nyakenye.
Isifunda Amajuba yisona kuphela esingenaso isikole esithole ngaphansi kuka30%.
IZululanda iyona enezikole eziningi ezithole ngaphansi kuka-30%, ilandelwe iLembe ngezingu-15 kugcine uMzinyathi ngezingu-14.
UMthembu uthe othisha bacijwa ezifundweni abangenzanga kahle kuzona ukuze baziqonde kalula.
Uthe uma beziqonda kuzoba lula ukuthi bafundise izingane lezo zifundo.
“Siyibhekile nendaba yokuthi bakhona yini othisha kulezi zikole. Sibheka nomlando wazo wokuthi bezenzanjani eminyakeni edlule,” kusho uMthembu.
Mayelana nokufunda ngamaholidi kwamatric, uthe zihlukene kathathu izikhungo okuzofundelwa kuzona.
Uthe ezinye izikole zizozifundela ngazodwana, ezinye zizofunda ngamaqoqo okuzohlelwa yiminyango yezifunda bese ezinye zifundele kuma-camps.
“Kumacamps kuzobe kulalwa khona, ezizofunda ngamaqoqo kuzohlela izifunda nakhona kuzoba nothisha abangongoti ezifundwei ezithile abazobe befundisa. Bese kuba nezikole ezizozifundela ngazodwana okuyinto ehlale yenzeka minyaka yonke,” kusho uMthembu.
Kuzoqala ngempelasonto ukufunda kumacamps asabalele ezifundeni ezehlukene kuphothulwe ngoJulayi 7.
UNgqongqoshe walo Mnyango uMnuz Mthandeni Dlungwane wathi kulawa ma-camp abazogxila kuphela kubafundi abenze kabi kodwa nalabo abenza kahle bazobathatha ngoba bafune benze kahle kakhulu uma sebebhala.