I-NHBRC imangalele abakhi ethi bawaka abantu
INATIONAL Home Builders Registration Council (NHBRC) imangalele abakhi abawu-122 ebasola ngokuwaka abantu ngokungayilandeli iHousing Consumers Protection Measures ka-1998.
Phambilini Isolezwe like labhala udaba lapho iNHBRC ibixwayisa abantu ngokuqoka omakhi abangabhalisiwe ngokusemthethweni.
Isikhulu esiphezulu seNHBRC, uMnuz Mziwonke Dlabantu, wagqugquzela umphakathi ukuthi wenze isiqiniseko sokuthi omakhi babhalisiwe ngokusethethweni ngaphambi kokubaqoka. Lokhu kwenziwa ngokuvakashela iwebsite ye-NHBRC ethi www.nhbrc.org.za nangokushayela inhlangano ucingo.
Izolo uDlabantu uthe kufanele iNBRC yaziswe ngazo zonke izindlu ezakhiwayo ngaphambi kwezinsuku eziwu-15 zokuqala komsebenzi wokuzakha.
“Umsebenzi wethu wukuqinisekisa ukuthi abantu kabawakwa wosonkontileka nabakhi abangekho emthethweni. Omakhi abangabhalisiwe bazoboshwa ngoba sisebenzisana namaphoyisa nabophiko lwezokushushisa. Sizobheka wonke umuntu osebenza kule mboni,” kusho uDlabantu.
Uthe bahoxise izimvume zokusebenza eziwu-211 bashushisa omakhi nosonkontileka abawu-506 abaphule imithetho yokwakha.
Babhekene namacala okwakha izindlu ezitshekile, eziqhekekayo nokungalandeli imithetho.
EGauteng bawu-70 osonkontileka nomakhi abaphucwe izimvume zokusebenza ngenxa yokuhluleka wukulungisa umonakalo ezindlini eziqhekekayo, eWestern Cape bawu-66, KwaZulu-Natal bawu-29, eLimpopo bawu16, eNorth West bahlanu, bathathu eFree State, Eastern Cape naseNorthern Cape.
Amacala abawashushisile athinta omakhi nosonkontileka ami kanje ngokwezifundazwe: KwaZulu-Natal 141, Gauteng 106, Western Cape 84, eLimpopo 44, eMpumalanga 39, eNorth West 35, e-Eastern Cape 28, eFree State 26 bese eba mathathu eNorthern Cape.
Uthe umthetho uyabavumela ukuthi bahlawulise omakhi u-R25 000 noma babanike isixwayiso babayalele nokuthi balungise isakhiwo uma betholwe benecala.