Kusolwa ‘ubugebengu’ kolwela umzala
UWOTHA ubomvu umndeni wowesilisa waseNkobongo, eShaka’skraal, okuthiwa ubhokodwe yinkunzi efuywe esikoleni sezolimo ezihambela emgwaqweni oseduze kwalesi sikole.
UMnuz Nkosinathi Gumede (27) ophazamisekile emqondweni ufuna ukuthi isikole iNorth Coast Agricultural School noma usihlalo wesigungu sabazali sakulesi sikole okuthiwa nguye umnikazi walesi sikole kube nguye omnxephezelayo.
UMnuz Sihle Mthiyane umzala kaGumede uthe umzala wakhe uphazamisekile ekhanda ngeke akwazi ukuzikhulumela.
UGumede uthe akazange ayibone inkunzi efuywe kulesi sikole, uthuke isiseduze kwakhe, wahluleka ukubaleka, yamukha ngophondo esiswini, walahleka phansi.
UGumede akakwazi ukugijima ngenxa yomthungo wakhe osekhanda othikameza ukusebenza komzimba wakhe.
UGumede uthe ngesikhathi kwenzeka lokhu wabonwa uMnuz Vishnugopal Govender usihlalo weSchool Governing Body (SGB), owamphuthumisa esibhedlela.
UMthiyane uthe sekuphele amasonto amathathu egqigqa kulesi sikole ezama efuna isinxephezelo kodwa isikole siyazihlangula ngale nkomo sithi akuyona eyaso ekaGovender
“Ngakolunye uhlangothi uGovender akafuni nokukhuluma nami, uthi ngifuna ukususa uthuthuva, ngento engangithinti. Mina ngiyamkhulumela umzala ngoba uphazamisekile kancane ekhanda ngeke akwazi ukuzikhulumela.
“Isikole kumele simnxephezele ngokulimala kwakhe, uma inkomo kungeyona eyesikole kungekaGovender yena kumele amnxephezele,” kusho yena.
Ethintwa ngalolu daba uGovender uvumile ukuthi uyalwazi udaba wathi izinkomo zihlala ngaphakathi esikoleni kodwa ngalelo langa kwakunqanyulwe ucingo lwesikole ebusuku, izinkomo zaphuma zaba uvanzi.
“Enye yalezi zinkomo inkunzi enolaka, uGumede akakwazanga ukubaleka ngoba akaphilile kodwa silukhulumile udaba. “UMthiyane usebona ithuba lokwenza imali yingakho esefuna isinxephezelo.
“Ufike wathi ufuna uR5 000, uR10 000 manje usethi ufuna uR15 000 wesinxephezelo. Okusempeleni le nto ayenzayo ayihlangene nokuzwelana noGumede wenziwa ukuthi uyisigebengu. Siphambana naye ngenxa yobugebengu bakhe.
“Usebona ithuba lokuthi azitholele imali esheshayo, ayikho imali azoyithola, ngoba ucingo lwalunqwanyulwe amasela,” kusho yena.
UMnuz Scelo Khuzwayo okhulumela uMnyango wezeMfundo kulesi sifundazwe, uthe uyazwelana noGumede kodwa umndeni kumele uqonde ukuthi ukulimala kwakhe akudalwanga ubudedengu babasebenzi besikole, amasela anquma ucingo, ngeshwa kwavela ingozi lungakalungiswa.