Izinyunyana zichitha isiphakamiso se-Eskom
ZISICHITHILE isiphakamiso sikaEskom sokunyusa amaholo ngo-4.7% izinyunyana ezintathu ezixoxa nenkampani.
UNobhala Jikelele weNational Union of Metalworkers of South Africa (Numsa), uMnuz Irvin Jim, izolo uthe abasebenzi basichithile isiphakamiso se-Eskom.
“SiyiNumsa, National Union of Mineworkers (NUM) neSolidarity sisichithile isiphakamiso se-Eskom base becela ukunikwa ithuba lokuthi bakhulume nabaphathi babo. Sizobanika ithuba bese sibuye sixoxe nabo kusasa (namhlanje,” kusho uJim.
Uthe baxoxile ne-Eskom bebachushisa ngezindlela zokwhlisa izindleko kodwa abakwazi ukuzidalula kwabezindaba ngaphambi kokwazisa abasebenzi abangamalungu abo.
Ebuzwa ukuthi ngabe bona basehlisile yini isicelo sokuthi amaholo anyuswe ngo15%, uJim uthe lokho abakwazi ukukudalula okwamanje ngoba izingxoxo zamaholo zibucayi kodwa bazolinda ukuzwa impendulo yakwaEskom.
“Ngeke sikhulume izindaba zethu zonke nabezindaba ngoba sithunywe ngabasebenzi. Kufanele sibuyele kubasebenzi bese silinda nempendulo ye-Eskom,” kusho uJim.
Phambili izikhulu ze-Eskom beziveze ukuthi azinayo imali yokunyusa amaholo kodwa emuva kokungenelela kukaNgqongqoshe wamaBhizinisi kaHulumeni, uMnuz Pravin Gordhan, babeka etafuleni u-4.7%.
Ekhasini lezokuxhumana leNumsa, ibibhale ukuthi i-Eskom ingazehlisa izindleko zokudayiswa kukagesi uma izogxila kophehlwa emalahleni obiza u-42 cents kodwa uma izogxila ohlelweni lwama-Independent Power Producers (IPPs) ugesi uzobiza u-R1.88.
Iphinde yaveza ukuthi ukusetshenziswa kwama-IPPs kuzoholela ekuvalweni kweziteshi zikagesi nasekutheni abasebenzi abawu92 000 baphelelwe wumsebenzi.
Iphakamise nokuthi uma kwehliswa isibalo sezikhulu eziphezulu ezibalelwa ngaphezu kuka-500 i-Eskom ingonga u-R200 million.