Kuthungathwa abanesifo sofuba abangakahlolwa
USUQALILE umkhankaso wokuthungatha abantu abangu-160 000 abanesifo sofuba kodwa abangakayi kohlolwa futhi kunethemba lokuthi kuzobe sekutholwe abangu-40 000 ngoSepthemba.
Ngaleyo nyanga kuzobe sekuqala umhlangano we-United Nations ogxile esifeni sofuba, ozohanjelwa wohulumeni bamazwe omhlaba ozoba seNew York.
INingizimu Afrika ithemba ukuthi izomemezela ukuthi isithole abantu abangu-40 000 abesifo sofuba kodwa abangazazi. Emhlabeni bangu-4 million abantu abanesifo sofuba futhi abadla imishanguzo yokusilapha.
UNgqongqoshe wezeMpilo kuleli, uDkt Aaron Motsoaledi, utshele izihambeli zengqungquthethela yesifo sofuba ebiseNkosi Albert Luthuli International Convention Centre (ICC) ngesonto elidlule ukuthi yize isifo sofuba silapheka kodwa yisona esihamba phambili ngokubulala abantu.
Uveze ukuthi amadoda awazihloli ngakho kufanele agqugquzelwe ukuthi aye emitholampilo ukuze asheshe athole usizo. “Sizohambela amafemu, amashibhi, amakhaya nazo zonke izindawo ezikhonzwe ngamadoda ukuze siwahlolelele isifo sofuba. Sizozimemezela maduze izinhlelo zethu zokuhlola abantu abangazazi ukuthi banesifo sofuba,” kusho uMotsoaledi.
UMotsoaledi unguSihlalo womkhankaso iStop TB Partnership olwenziwa yi-United Nations ukulwa nesifo sofuba.
Uthe yize esebe ngudokotela iminyaka eminingi kodwa kusamethusa ukuthi kule minyaka engu-200 edlule isifo sofuba sesibulale abantu abaningi ukudlula labo ababulawe yi-smallpox, bubonic plague, malaria, ebola, cholera, influenza ne-HIV.
Uveze ukuthi okwenza abantu babulawe yisifo sofuba wukuthi ayisukunyelwanga njengezinye izifo.
Uthe kuyafana ne-ebola ethuse uhulumeni waseNingizimu Afrika nesizwe yize ibikwamanye amazwe kodwa ayibulalanga muntu.
Uveze ukuthi i-ebola ayibulalanga muntu kuleli kodwa isifo sofuba sibulale abangu-40 000.
Emhlabeni i-ebola ibulale abantu abangu-11 000, isifo sofuba sibulale abangu-1.5 million emhlabeni.
UMotsoaledi wayeshilo ngo2016 ukuthi isifo sofuba sidinga ukusukunyelwa ngoba sibulala abantu abaningi.
“Kufanele sibe yisizukulwane esiqeda isifo sofuba emhlabeni jikelele ukuze abantu bangafi singakafiki isikhathi.
“Sidinga usizo emphakathi nasezinhlanganweni eziwusizayo. Sizohambisa umyalezo wokuthi kuqedwe isifo sofuba kubantu baseNew York,” kusho uMotsoaledi.
Ucele bonke abantu bakuleli ukuthi babe nomkhankaso wokulwa nesifo sofuba.
Uphinde wakhala ngokuthi iKenya ayinayo imali eyibekele ukulwa nesifo sofuba esho ukuthi badinga ohulumeni babe sekhaleni lomkhankaso wokulwa nalesi sifo.
IPhini likaMengameli waseNingizimu Afrika, uMnuz David Mabuza, ovule ingqungquthela uthe elakuleli liyalwa nesifo sofuba kwazise bangu-85% abantu abalashelwe sona ngo-2016.
Uthe ukuthulwa kwemishanguzo emisha yokulwa nesifo sofuba esingalapheki balindele ukusindisa bantu abaningi.
UDkt Margot Uys, uthe ngonyaka odlule babhalise iziguli ezingu-227 000 eziphethwe yisifo sofuba kodwa wathi asenele lesi sibalo ngoba baningi esibaphethe kodwa abangasilaphi.