Abantu bacelwa bahoxe kugesi
UMASIPALA weTheku ugqugquzele abantu abahlala ezindaweni ezakhelene nePinetown ukuthi bangayixhumi impahla kagesi ngeSonto njengoba kuzobe kulungiswa ugesi ezindaweni ezihlukene.
Esitatimendeni, uMnuz Mandla Nsele, oyiNhloko yoPhiko lwezokuXhumana kuMasipala weTheku esabambile, uthe ngeSonto kuzolungiswa ugesi phakathi kwezikhungo zikagesi eziseKlaarwater naseHillcrest/ Waterfall.
Ukulungiswa kukagesi kuzokwenza ukuthi kusukela ngo-7 ekuseni kuze kube ngu-1 emini kunqamuke ugesi eHillcrest, Waterfall,Botha’s Hill, Assagay, Dassenhoek, Ntshongweni, KwaNgcolosi, Kwanyuswa, Gillits, Molweni, Crestholme naseWinston Park.
Uthe abantu abadinga eminye imininingwane ngokunqanyulwa kukagesi bangafona ku-080 13 13 111.
Kwezinye izindawo ugesi uzonqamuka ngenxa yohlelo lwakwa-Eskom oveze ukuthi kuzothatha izinsuku ezingu-10 ukuthi isimo sibuyele kwesijwayelekile emuva kwesiteleka sabasebenzi.
Abasebenzi bakuphikile ukuthi ibona ababangele ukuthi kunqanyulwe ugesi kodwa bathi abaphathi bakwaEskom abahluleka wukulungisa izinkinga.
Izolo abakwaEskom bathe ugesi uzocinywa ngokwesigaba sokuqala, bacela abantu ukuthi babheke uhlelo lokucinywa kukagesi lapho behlala khona.
EThekwini uhlelo lokucinywa kukagesi lutholakala ku-www. durban.gov.za
Uma kuthiwa ugesi uzonqanyulwa ngokwesigaba sokuqala kusho ukuthi uzonqamuka ihora elilodwa, isigaba sesibili kusho amahora amabili bese isigaba sesithathu sisho amahora amathathu.