Lude ukhalo oseluhanjiwe ngamakheli abavoti: IEC
IKHOMISHINI yezokhetho i-Independent Electoral Commission (IEC) ithi lide ibanga eselihanjiwe odabeni lokuqinisekisa amakheli abavoti abangu-1.3 million njengoba ifuna ukuhlangabezana nomnqamulajuqu weNkantolo yoMthethosisekelo, ngaphambi kokhetho lwangonyaka ozayo.
Le khomishini ibivele phambi kwekomiti elibhekele inhlalo ePhalamende iyobika ngokulungela ukhetho lwangonyaka ozayo.
Isikhulu se-IEC uMnuz Granville Abrahams sithe bakwazile ukuqoqa amakheli angu-2 million kwangu-8 million.
“Lude ukhalo esiluhambile. Siye kobheka emabhukwini ethu ukuze siqinisekise ukuthi wonke amakheli akhona. Ngokhetho lohulumeni basekhaya ngo-2016 siqoqe amakheli angaphezulu kuka-2 million.”
NgoJuni 2016 iNkantolo yezoMthethosisekelo yayalela i-IEC ukuthi iqinisekise ukuthi bonke abasohlwini lokuvota banawo amakheli.
Inkantolo yanika le nhlangano izinyanga ezingu-18 ukuthi iphothule lowo msebenzi.
U-Abrahams uthe bacela ukuthi balulelwe isikhathi sokuqoqa amakheli, wathi banethemba lokuthi bazokwenza lokhu ngaphambi kokuba uMengameli Cyril Ramaphosa amemezele usuku lokhetho.
“Sinabavoti abangu-8.4 million abanamakheli agcwele, abangu-8.6 million abanawo agcwele, kuthi abangu-7.8 million ayicaci eyabo. NgoMeyi 8, 2018 besinabangu-2.2 million abangenawo nhlobo amakheli.
Inkantolo yanquma ukuthi kumele sithole amakheli abavoti ababhalise kusuka ngoDisemba 2003.
Sithole ukuthi bangu-900 000 abavoti ababhalisa ngaphambi kuka-2003,” kusho u-Abrahams.
Uthe bazofaka isiphakamiso sokuthi kube nomthetho othinta indaba yokuthi amaqembu ezepolitiki abhalise nge-internet, kususwe eminye imigoqo ethinta ukubhaliswa kwabavoti abanezinselelo kwezempilo.”
Ikhomishini ithe izophinde ibhalise abafuna ukuvota ngoFebhuwari 2019, okuyobe sekuyithuba lokugcina.