Bacela ukunyuka kukaphethroli kuhambisane namathuba omsebenzi
BAKHALA ngokunyuka kukaphethroli nokudla okuzabaqothula amaphakethe abantu. Abagibeli bamatekisi nabashayeli abakhulume neSolezwe njengoba kusanda kunyuka uphethroli futhi usazophinde unyuke, bathi bafisa uhulumeni azame izindlela zokuthi akhe amathuba omsebenzi ukuze bezokwazi ukumelana nezindleko zempilo ezidalwa ukunyuka kwezinto. UKWANDOKUHLE NJOLI ukhulume nabantu kwathi uMOTSHWARI MOFOKENG wathwebula izithombe.
UNksz Avela Maduna (29) uthe: “Ukunyuka futhi kukaphethroli kusho ukusikhubaza kakhulu ngoba lokhu kuqonde ukuthi yonke into izokhuphuka kubalwa nemali yokufunda. Lokhu kungiphatha kabi ngoba ngifundisa izingane zasekhaya, imali engiyikhiphayo iningi. Njengoba ngizisebenza le mali engiyithola la, yanele ukudla khona lokhu okubizayo.” Uthe ufisa uhulumeni anyuse imali yokuxhaswa kwabafundi.
UMNuz Siyabonga Khuzwayo (36) waseThekwini uthe ufisa uhulumeni amusize ngokumnikeza imvume yokuthi inqola yakhe kube inqola ehamba idolobha lonke ayi ukuthi ime endaweni eyodwa. “Njengoba linyuka izinga lokuphila nophethroli, nami anginikwe imvume ukuze ngizokwazi ukumela ukukhuphuka kwenzinto.”
UNksz Nobuhle Ngcobo (25) waseThekwini uthe akumphathi kahle ukuthi zonke izinto ziyanyuka ngoba imisebenzi ayikho.
“Ngifisa ukuthi njengoba uhulumeni enyusa yonke into, kunyuke namaholo adale namathuba emisebenzi.”
UMnuz Steven “Stevovo” Ntombela waseMlaza ukhala ngokunyuka kwemali kaphethroli. “Ukukhuphuka kukaphethroli kusisebenzisa kabuhlungu njengoba thina sisebenzisana nabagibeli ngoba abagibeli bakhala kithi uma sesinyusa imali yokugibela.” Uthe ufisa uhulumeni ehlise imali yokuthenga uphethroli ukuze umsebenzi wabo uqhubeke kahle.
UPastor Mdletshe waseManguzi uthe uphethroli unyuke kakhulu ekubeni usazonyuka ngenyanga ezayo futhi. Ukhale nangokuthi unezingane ezifundayo ezigibela izimoto zomalume nazo ezisazophinde zinyuse imali yokugibela. “Ngifisa uhulumeni akhombise ukuzwelana nathi ehlise uphethroli.”
UMnuz S’fiso Bhengu waseQuarry Hieghts ukhala ngokunyuka kwamanani okudla. “Njengomuntu okuthandayo ukudla, ukukhuphuka kwakho kungiphatha kabi kakhulu.
Uhulumeni uma ekhuphula uphethroli uqonde ukuthi nokudla akukhuphuke kanti imali ayikho.”