Umdwebo kaMkhize uneNhlakanipho
UNESIFISO sokuthi umsebenzi wakhe ubonakale nasemazweni aphesheya umdwebi waseThekwini ozakhela igama kwezobuciko ngokudweba osaziwayo.
UNhlakanipho Mkhize (28), okhulele oLundi, KwaZuluNatal, ungomunye wabadwebi abasafufusa abasethubeni lokunqoba umncintiswano weBIC Art Master nonyaka.
UMkhize usevele uqalile ukuzakhela igama ezinkundleni zokuxhumana ngokudweba osaziwayo okubalwa kubo uBlack Coffee, Lerato Kganyago, Boity, Bonang Matheba, DJ Sbu, Cassper Nyovest nabanye. UMkhize uthe useqalile ukuvuna izithelo ezinhle ngomsebenzi wakhe.
“Ngonyaka odlule kwenzeka isimanga empilweni yami uBlack Coffee ethenga isithombe sakhe engasidweba. Lokho kwangijabulisa kakhulu futhi ngazizwa nginentshisekelo yokuthi ngiqhubeke nokudweba ngale ndlela. Nalaba abanye engabadweba babonga ezinkundleni zokuxhumana bebona izithombe zabo esengizidwebile” kusho uMkhize.
UMkhize uthe uqale ukudweba eneminyaka eyisishiyagalolunye eqhudelana nabangani bakhe esikoleni. Uthando lokudweba lwahlala kuye kwaze kwaba uphothula iziqu ze-Architectural Technology eDurban University of Technology. Njengamanje usebenzela inkampani ye-Architecure kodwa uthe inhliziyo yakhe igxile ekudwebeni.
“Isifiso sami wukuthi umsebenzi wami ubonakale futhi waziwe emazweni aphesheya ngemuva kokuduma eNingizimu Afrika. Ngifuna ukugqugquzela intsha ibone ukuthi ungaphumelela kwezobuciko, nanoma yini ofuna ukuzithuthukisa ngayo, uyiguqule nempilo yakho. Sihlezi sizwa ngabadwebi bangaphandle, ngicabanga ukuthi sekuyisikhathi sokuthi intsha ibukele kubadwebi bakuleli,” kuqhuba yena.
UMkhize, okhuliswe wuninakhulu ngemuva kokushona kukanina ngo-1996, uthe usethole ukwesekwa okukhulu ezihlotsheni zakhe kanti nokuba sedolobheni laseThekwini kumvule amehlo kwezobuciko.
Nonyaka ungenele umncintiswano weBIC Art Master aqokelwe kwiTop 20 kuwo. Ngesikhathi sokushicilela uMkhize ubehlezi endaweni yesibili emncintiswaneni okuvotwa kuwo kwi-website yakwaBIC. Ukuvota ungangena ku: http://bam. biccentral.com ubheke igama lakhe kwi-Art Gallery bese uyavota.