Hlangana mhlathi owazanayo: Cosatu
UBUHOLI obusha beCosatu KwaZulu-Natal buzibophezele ekutheni buhlangane namadlelandawonye, okubalwa ne-ANC kwakhiwe ubumbano.
Lobu buholi buthe bukhathazekile ngokuthi i-ANC ihlukene phakathi.
UNobhala walo mfelandawonye uMnuz Edwin Mkhize, obuyele kulesi sikhundla, uthe ingqungquthela yangeledlule yeCosatu izwakalise ukukhathazeka ngokwehlukana kwi-ANC.
Uthe le nhlangano ihlukene ngesikhathi lapho iDA ingenisa khona ezizindeni ze-ANC.
“Siyajabula ukuthi iSACP ifuna kubuyekezwe umbimbi. Sizoqhubeka siyixoxe eyokuthi izinhlangano zomphakathi, iSACP, Cosatu neSanco ukuthi zingenele ukhetho,” kusho uMkhize.
I-SACP ike yaphakamisa ukuthi kumele le nhlangano ingenele ukhetho ngokuzimela ingeseki i-ANC. Indaba yokungenela ukhetho yinto esaxoxwa ngaphakathi kwiSACP.
UMkhize uthe ubumbano yinto ehamba phambili njengoba nengqungquthela yangoDisemba ye-ANC eNasrec yanquma ukuthi ubumbano kumele luhambe phambili.
Uthe bazolwa nokunyuka kweVAT nezinye izidingo ezizoshaya abasebenzi.
“Ngeke sikuvumele ukunyuswa kwezidingo ezifana nogesi, amanzi kanjalo nophethroli,” kusho uMkhize.
Uthe bazolwa nesihlava sokudlwengulwa kwabesifazane, ukubulawa kwezingane kanjalo nalabo abaphila nokukhubazeka.
“Sizolwa nokuxhashazwa kwabasebenzi ngohlelo lwamalabour brokers, ukusetshenziswa izikhawu kwabasebenzi kanjalo nokuthi kuqalwe uhlelo lwezempilo iNHI.”
Uthe ingqungquthela ibithanyelwe amalungu angu1092 kwangu-1273 abelindelwe, abemele amalungu angu-287 407 ezinyunyana zeCosatu esifundazweni.
Uthe bayilindele ngabomvu ingqungquthela ezokhuluma ngemisebenzi ezoqhamuka namaqhinga okukhulisa umnotho, yakhe amathuba emisebenzi, ibhekane nenkinga yokungasebenzi kwabantu kanjalo nokudilizwa kwabasebenzi.
“Sizoqhubeka silwele indaba yeholo eliphilisayo noma kukhona okuzuziwe mayelana naleli holo.”
Uthe basamile ekutheni umhlaba kumele ubuyiswe ngaphandle kwesinxephezelo.
“Kumele ubuyele kubanikazi bawo ngoba wathathwa ngendlela engafanele. Kwakuyilolu suku (Juni 19, 1913) lapho kwaphasiswa umthetho wezomhlaba, kwaphucwa abamnyama umhlaba wabo, abamhlophe baqhubeka nokuba nomhlaba.”
Ingqungquthela ikhethe uSihlalo uMnuz Skhumbuzo Mdlalose, iPhini lakhe kwaba nguMnuz Phumlani Duma, onguSihlalo weSadtu esifundazweni, uNksz Zodwa Mzindle kwesikaMgcinimafa noMkhize kwesikaNobhala.