Zigunyaziwe ezomthetho e-Unisa
SIGCINE sigunyazwe ngokugcwele ukuthi siqhubeke neziqu zomthetho isikhungo semfundo i-Unisa njengoba iCouncil on Higher Education (CHE) ibihlola iziqu zomthetho ezikhungweni ezenzisa lezi ziqu.
Uthishanhloko walesi sikhungo, uSolwazi Mandla Makhanya, uthe bajabule ngokuthi iCHE igcine ishayelele isipikili sokuthi baqhubeke benzise iBachelor of Laws (LLB).
Uthe isinqumo sathathwa yikomiti iHigher Education Quality Committee (HEQC) emhlanganweni walo ngoJuni 7, 2018 kulandela ukuhambisa kwabo kulona uhlelo oluthe thuthu lokuphucula ukufundiswa kwalezi ziqu nyakenye.
“Kunezinto abaziphakamisa ngesikhathi kubuyekezwa indaba yokufundiswa kwalezi ziqu. Ngemuva kokubuyekewa kwabe sekukhishwa isexwayiso sokuthi kungenzeka kuhoxiswe ukufundiswa kwazo ezikhungweni ezehlukene okwakubalwa ne-Unisa,” kusho uMakhanya.
Uthe uhlelo lwabo oluthe thuthu lokuphucula ukufundiswa kwalezi ziqu lwagxila emunxeni emine kwemihlanu eyayidingeka ukuze isikhungo siqhubeke sifundise lezi ziqu.
“NgoMeyi 10, nonyaka sahambisa uhlelo lapho sasiveza esikwenzile ukuhlangabezana nayo yonke imibandela, yingakho iCHE inqume ukuthi siqhubeke nokufundisa lezi ziqu. Siyazamukela lezi zindaba eziqinisekisa ukuthi siqhubeke nalezi ziqu. Kuhlezi kuyinto esiyibeke eqhulwini ukuthi sifundise iziqu ezisezingeni ezinesisekelo esigunyazwe yizinhlaka ezifana neCHE.”
Nyakenye iCHE yakhipha isexwayiso ezikhungweni ezehlukene kubalwa neNyuvesi yaseKapa sokuthi uma zingahlangabezani nemibandela yayo kungenzeka ziphucwe ukufundisa lezi ziqu. Esinye isikhungo esatshelwa ukuthi silungise izinto noma siphucwe ilungelo inyuvesi yaseZululand, oNgoye.
Lezi zikhungo zanikwa kuze kube inyanga edlule ukuthi zilungise izinto iCHE eyakhala ngazo noma ziphucwe ilungelo lokwenzisa lezi ziqu.
ICHE yaveza ukuthi iziqu zenyuvesi iWalter Sisulu (WSU) sezihoxisiwe ngenxa yokuhi ayizange ihlangabezane nemibandela.
Bekungokokuqala iCHE yenza ucwaningo lweziqu ezikhungweni ezehlukene selokhu yasungulwa ngaphansi komthetho iHigher Education Act ka-1998. Ngaphandle kokugunyazwa yiCHE inyuvesi ayikwazi ukwenzisa iziqu.