UMchunu ucashise uZikalala
MHLELI: Ngiyabezwa nje abantu bethi izinkantolo aziphume ziphele kwipolitiki yaseNingizimu Afrika. Akusizona izinkantolo eziya ezinhlanganweni, kepha yizona inhlangano eziziyela kuzo.
Konke lokhu okuholela ekutheni inkantolo zibambe iqhaza emaqenjini yingoba abaholi bezepolitiki abafuni ukuhlonipha imithetho yamaqembu abo.
Okungenze ngaloba kuleli phepha lakho ukuthi iqembu elibusayo liholwa yizimpumputhe esifundazweni iKwaZulu-Natal kodwa lithi izwi “Abangaboni bazobona uma kufundiwe” . Yebo, kunjalo futhi i-ANC izolutheza olunenkume uma behambisa izinhloso zabo zokufuna izikhundla.
Kuyiqiniso ukuthi uMnuz Sihle Zikalala unezinhloso ezimbi ngengqungquthela lena aseyihlalise kabili ibhuntshe. Uzokhumbula ukuthi yahlala ngo-2016 baketula uSenzo Mchunu benoJacob Zuma, lapho uMsholozi wayesengumengameli wezwe, kuleso sikhathi bafakwa enkantolo bahlulwa ngokuthi bahlalisa inkomfa ngokungekho emthethweni.
Sithuli nje siyabuka sisemazingeni aphansi ukuthi uZikalala uhlose ukuba undunankulu emuva kokhetho, okuyinto engeke yenzeke uma kusemapeketwane kanje enhlanganweni yethu esizifela ngayo.
Siyazi ukuthi ukubekwa kukaMnuz Willies Mchunu kufana nokucashisa isikhundla kukaZikalala njengomuntu ongasinakile kanti usifuna ngabomvu emva kokhetho.
Sengathi uzophola-ke mfo ka Khuzeni kuze kube ulungisa isimo sobumbano enhlanganweni. Thina sifuna ukulubona ngamehlo ubumbano ngokuthi wena sikubone udlubhe isikibha esinobuso bukaMengameli Ramaphosa esizomvotela ngonyaka ozayo. Lokho kuzophaphamisa la magatsha asagqoka izikibha ezinobuso bukaZuma, okungekuhle kwi-ANC. Ngithokozile uma ibhuntsha ingqungquthela ye- ANC ebisoNgoye ebihlelwe ngokungemthetho. Lokhu kuzokwenza uZikalala nahola nabo balalele amagatsha enhlangano ngokuthi kwenziwe ubumbano. Sonke asisho ngazwi linye sithi Thuma Mina!
Lesi siqubulo sihle impela kubaholi be-ANC abalandela imiyalezo yabantu bakuleli ukuba baye lapho bethunywa khona, bengalingisi uJona owathunywa eNiniva kodwa wabheka eNtalashishi. INiniva ngiyifanisa nempilo engcono, iNtalashishi yizwe eliholwa ngenkohlakalo.