Kujivaza uJuni 16 ukudlubha umfaniswano bese udakwa
Khabzeka “KB “Mzimela EZWELIBOMVU MHLELI: Kufikiselana ngamahloni esikubona emiphakathini yethu ngalolu suku olubizwa ngoSuku lweNtsha okungumhla ka-16 Juni.
Ngicabanga ukuthi sekufike la uhulumeni wethu sekumele alufakele izibuko udaba lwalolu suku aphinde alubuke ngeso elibanzi. Esiyaye sikubone emiphakathini yethu esiyakhele ilabo dadewethu nabafowethu bezimpintshe ngomfaniswano wesikole, bebhiyoza ezindaweni zokucima ukoma.
Uyacabanga ubona umuntu omazi kahle ukuthi isikole samehlula wancama usumbona ngalolu suku ewugqoke waphelela umfaniswano wesikole esexhakwe ngesandla ngenxa yokudakwa mawala. Lokhu kuyaye kusithunaze kanjani isithunzi sesikole asuke edlubhe umfaniswano waso. Kumele uhulumeni wethu ashaye umthetho wokuthi laba bafowethu nodadewethu uma beke babonakala bedlubhe umfaniswano babhekane necala, ngale kwalokho kuzoba kwampunzi edla emini kuleli lakithi.
Siyavuma ukuthi zikhona izingqinamba ezibhekene nabantu abasha kuleli njengakho nje ukungaqasheki nodaba lomnotho osesezandleni zabamhlophe kodwa lokho akungasenzi izimpumputhe size senze nezinto ezisithunaza isithunzi njengabantu abasha.
Kubalulekile ukuthi sibe yinxenye yemicimbi esuke ihleliwe ngasemakithi, singakhohlwa wukuthi kunemiphefumulo eyaphuma kwaba nabantu abafa ngoJuni.
Ngifuna ukushayela ihlombe intsha yalapha eNquthu eHlathi Dam ikakhulu ebeyihlele umcimbi wokukhumbula lolu suku, yaqoqa abantu abasha endaweni. Ngiphinde ngincome nosomabhizinisi baseNquthu ikakhulu abasemabhizinisini abangcwabi, ngabathe bakwenza baphonsa itshe esivivaneni ukuze lo mcimbi ube yimpumelelo.
Ngabakwenzile bakhombisile ukuthi ababona osomabhizinisi abangogombela kwesabo kepha umphakathi uma ucela uxhaso bayakwazi ukwelula isandla. Mxolisi Manyathi ENQUTHU