UMasipala wasoPhongolo uzokhuthaza abenza kahle
UMASIPALA wasoPhongolo uzochoma ngophaphe lwegwalagwala izakhamuzi zawo ezenze umsebenzi oncomekayo.
IMeya yalo masipala uNksz Bawinile Nhlabathi, ithe yize bengumasipala omncane kodwa babone ukuthi baningi abantu abakhele umasipala wabo abasebenza ngokuzikhandla, besiza umphakathi wasendaweni kodwa banganconywa.
“Okubalulekile wukuthi uma wenza umsebenzi omuhle, unconywe ukuze ukhuthale. Ngokunconywa kwakho kukhuthazwa nalabo abanyanyalatayo ukuthi benze kangcono. Uma singaba nabantu abaningi abenza kahle umasipala wethu ungathuthuka. Yingakho sithe kulo nyaka kaMandela, asisungule izindondo zokubonga abasebenza kahle,” kusho imeya.
Lezi zindondo ezaziwa ngoPhongolo Municipality Business Excellence Awards, zizoba ngoJulayi 28, zethulwe ngokusemthethweni kule nyanga. Ukungenela kuvulwe ngayo le nyanga, kuzovalwa ngoJulayi 12.
Unxuse umphakathi ukuthi uqoke obona befanele ukuchonywa olwegwalagwala emunxeni elandelayo: Umsebenzi owenza kahle umsebenzi wakhe, usomabhizinisi ohambisana nemigomo ebekwe ngumasipala, iphrojekthi exhaswe ngumasipala esebenze kahle, umdayisi wasezitaladini ovelele, ibhizinisi lomuntu omusha elisebenza kahle, indawo yezokuvakasha ebe nezivakashi eziningi, umlimi ovelele, ushampeni wamabhizinisi wesifazane, inxusa lemikhiziqo yasoPhongolo elivelele, nenkakha yamabhizinisi asoPhongolo.
UNksz Nhlabathi uthe le minxa ikhethwe ukuze ihambisane namabhizinisi akule ndawo.
“Indawo yasoPhongolo inothe ngeziqiwi, izindawo zokuvakasha, ukongiwa kwemvelo nezolimo yingakho imikhakha esiyikhethile isondelene kakhulu nayo. Usomabhizinisi noma umuntu ozibonayo ukuthi ukufanele ukuchonywa uphaphe ngomsebenzi wakhe, angalindi ukuqokwa, angaziqoka yena,” kusho uNksz Nhlabathi.
Kungenelwa ngokuthi kutholwe amafomu kwi-website ethi www. uphongolo.gov.za noma alandwe emahhovisi kamasipala. Amafomu aphindiselwa emahhovisi kamasipala noma athunyelwe ku awards@uphongolo.gov.za.